د. أمير فهمي زخارى المنيا
من مقالات تصحيح بعض المفاهيم المغلوطة...
المقاله دى عاوزه الهدوء فى قرائتها...
حضارتنا اسمها الحضارة المصرية القديمة مش الفرعونية وآثارنا اسمها الآثار المصرية مش الآثار الفرعونية... الجزء الأول
بص يا عزيزى القارئ كلامي النهاردة لازم تاخد بالك منه جداً علشان فى خطأ كبير بنقع فيه وهو خطأ فادح...
اغلبنا لما يجي يذكر المصريين القدماء بيقول عليهم "الفراعنة"، لكن دا اسم غير مقبول بيه اطلاقاً
تعالى اقولك ليه غلط نقول عليهم الفراعنة والصح إننا نقول عليهم المصريين القدماء...
الاول بس عاوزك تعرف ان كلمة الفراعنة لم ترد في أي بردية قديمة ولم تُنقش على أي حجر مصري قديم دي حاجه،
اما الحاجه التانيه تعالى هكلم معاك فى نقطه فرعون..
هل هي لقب ام اسم ، لو كانت لقب يبقى ينفع نقول عليهم الفراعنة
ولو ظهر خلاف ذلك وكانت كلمة فرعون اسم يبقى مينفعش نلقب بيه الحضارة المصرية القديمة، علشان مينفعش ألقابها بأسم رجل طاغيه.
بص يا عزيزي القارئ
العهد القديم في الكتاب المقدس ... لما جه يذكر كلمة فرعون مذكرهاش على إنها لقب، وإنما اسم علم "اسم شخص"
يقول سفر الخروج 7: 3-4 في الكتاب المقدس:
"وَلَكِنِّي اقَسِّي قَلْبَ فِرْعَوْنَ وَاكَثِّرُ ايَاتِي وَعَجَائِبِي فِي ارْضِ مِصْرَ. وَلا يَسْمَعُ لَكُمَا فِرْعَوْنُ حَتَّى اجْعَلَ يَدِي عَلَى مِصْرَ فَاخْرِجَ اجْنَادِي شَعْبِي بَنِي اسْرَائِيلَ مِنْ ارْضِ مِصْرَ بِاحْكَامٍ عَظِيمَةٍ".
والقرآن الكريم لما جه يذكر كلمة فرعون مذكرهاش على انها لقب، وإنما اسم علم "اسم شخص".
والدليل على دا مثلا الآية في سورة العنكبوت: "وَقَارُون وَفِرْعَونَ وَهَامَانَ وَلَقَدْ جَاءَهُم مُّوسَى بِالْبَيِّنَاتِ فَاسْتَكْبَرُوا فِى الْأَرْضِ وَمَا كَانُوا سَابِقِين"
جاء اسم فرعون في سياق بيتكلم عن أسماء علم ومش ألقاب، ودا اللي بيأكد ان كلمه فرعون اسم مش لقب.
علشان ف قاعده فى اللغة العربية بتقول ان اللقب لازم يضاف اليه "ال" مثلا زي السلطان او الحاكم...
وكلمه فرعون حتي متذكرتش مرة واحده بس في الكتاب المقدس أو القرآن الكريم ب "ال" التعريفية علشان نقول عليها لقب...
حتي كمان لو جينا نجمع كل الالقاب الملكية هنلاقيها ٥ ألقاب فقط للملوك المصريين...
وهما (سا رع – نب تا وى – نسو بيتى – حر نوب – حر) ومافيش بينهم لقب فرعون او حتي بر عا...
انت كدا اقتنعت ان كلمه فرعون اسم مش لقب لحد كدا انت تمام؟
نكمل بقا
ربنا سبحانه وتعالى وصف فرعون على انه طاغيه ازاي احنا بقا نلقب المصريين القدماء كلهم باسم طاغيه دا ؟ هل دا معقول!
في ناس دلوقتي هتقول أصل كلمة فرعون هي بـر عـا
وانا هرد عليه وهقولهم ان كلمة برعا دي كلمه معناها البيت الكبير او البيت العظيم.
وماكنتش ابدا لقب للملوك، يعني مثلاً مفيش خرطوش ملكي مكتوب عليه بـرعا امنحوتب الرابع مثلاً...
يا عزيزي القارئ حضارتنا اسمها الحضارة المصرية القديمة مش الفرعونية وآثارنا اسمها الآثار المصرية مش الآثار الفرعونية...
ممكن تقرأ البوست تانى كلمه كلمه و تقولى رأيك إيه...
والى اللقاء في مقالات أخرى لتصحيح بعض المفاهيم المغلوطة... تحياتي للجميع.
د. أمير فهمي زخارى المنيا
