تغير مجرى حياة  الانسان

للشاعر فايز البهجورى
العمر يفوتْ..
ولا حد بيأخذ بالْ .
واليوم بيفوت..
بيغَّيّر حال.. من حال.
                ***

وفى لحظة تفوت.
ملايين الناس تتعامل مع ملايين الناسْ.
د ا حبيب وقريبْ..
د ا زميل ..ودا جـار.ْ
د ا صديق وعزيـز..
ودا عـدو مكـّار.
ودا جاى بيبيـع..
ودا جاى سمسار.
ودا جاى مبسوط..
ودا جاى محتار .
ودا جاى يعمل معروف..
ودا جاى ينبش أسرار.
ولا واحد دارى بعمر يفوت..
ولا دارى بأنه فى يـوم حيمـوت..
ويقابل رب كريم ستّار.
                      ***

ودى لحظـة تفـوت.
ملايين الناس بتكـافح لجل القـوتْ.
فيه ناس بتجـوع...
فيه ناس بتعيـش...
فيه ناس بتمـوت.
                       ***

فيه واحد يسعى لخيـرْ..
والتانى بيضمر شـرْ..
والثالث ماشى فى حـاله..
والرابع عابـد ربـه..
وده ساجد للطاغـوت.
ولا دارى بعمر يفـوت.
ولا فاكر إنه فى لحظه يطب يموت.
                         * * *
واللحظة تفـوت.
زلزال بيهـزّ الأرض وتبلـع ناس.
بركان بيثـور وبيدفن   جهد وعرق الناس.
فيضان بيغـرّق أرض وزرع وناس.
وحريق بيشب يـدمـر مقتنيات الناس.
وزعيم يتـأمر لجل يموّت ناس.
وتقوم الحرب تسلط ناس على ناس.
والساعة تفوت..
ملايين الناس بتضيع وتموت..
ولا حد بيأخذ عبرة من اللى يموت.
------------------------
من " ديوان الشاعر والطريق "  للبهجورى