الطائر آبو مؤخرة
رمزى بشارة
الشاعر رمزى بشاره
طائر وِعَندُه مُؤَخِّرة
لَزَق وكات لَزقة بغِرَة
بيقول وعود مُتَبَخِّرَة
رئيس على مملكة الـ -
- طُيور . تِشُوفُه تَذبَهِل
النَّحس فين مايروح يِهِل
وِلَو وَعَد لازماً يِقِل
ومش أمين ولا مُستَقِل
سايب دماغُه للغُراب
حَسِّس طيورُه بإغتراب
بيعامِل العصافير بِغِل
وبظُلم جامِد وإفتِرا
الطائر آبو مؤخِّرة
قال هاأدِّى حَب بدون طابور
هاأبنى عشش خمس نجوم فوق الشَّجر
عدالة حُرِّيَّة وِنور
وكمان أمان من أى صياد أو خَطَر
100 يوم ياشَعب المملكة وِهتُشعُروا بالأنتَكة
وهاأحتِرم نَص القانون هاأمشى بدُستور الطيور
ولو كسرته فـ يوم خلاص إبقوا إعملوها دَربَكة
وإتجَمَّعوا قُصاد عِشِّتى وقولوا لى إمشى وياللا غُور
وأتارى كل دَه عشان يِنول غَرَض
ياما قال كلام وأمَّا مِسِك فَجأة إتمَحَى مـ الذَّاكِرَة
الطائر آبو مؤخرة
فات أد إيه فاتت شُهور
ماتِت طيور كتير قَوى وِقال قَدر
خَرَّج تَعابين مـ الجُحور
كَسَر القانون بَلطَج قَوى بالمُختَصَر
قَسِّم طيور المملكة لطيور معاه وطيور عليه
جَوَّع طُيور المملكة وراح يِبَعزَق فى البُذور
ماسَألشى أى نِسرهاج مِنقارُه مِتعاص دَم لِيه
وتخَيَّلوا حَبَس الحمام لكنه كَرَّم النُّسُور
أهله وعَشيرتُه قالوا لو طير إعتَرَض
يشوف له فيزا يعيش غريب مع طُيور مُهاجِرَة
الطائر آبو مؤخرة
بس الطيور بدأت تِثور
طارِت ولِقيت نَفسَها فـ نَفس القَفَص
ماهمهاش جَرح وكُسُور-
- أو موت.عَشان المَملَكة تشِم النَّفس
صِحيوا من الغيبوبة فاق كل إللى غَيِّب عَقلُه يوم
وإللى مازال سَليم فِهم إنه فى يوم هيجيلُه دُور
وإللى فَقد عَصفور عَزيز حِلف ماعادشى يجيلُه نوم
غير لو يجيب حق إللى راح ويشيل صاحِبنا من الجُدُور
وِدَه مش هَيِحصَل غير لو الكُل إتَّحَد
وخرجوا مِن كل العِشَش عًصافير شُجاعَة ثائرَة
عالطائر آبو مؤخرة
ramzybeshara@gmail.com
http://www.copts-united.com/article.php?A=78733&I=1377
