طباعة الصفحة

رجب حوش صاحبك عنى

د. وجيه رؤوف

بقلم: وجيه رؤوف
كثيرا ماتجمعنى جلسات الود والمحبه مع اخوتى المسلميين فمعروف عنا نحن معشر المصريين حب التعارف والموده واقامه الصداقات فى كل مناسبه وايضا بدون مناسبه , وطبيعى وتباعا ان بعض من اصدقاء اصدقائك يكونوا بالتبعيه لك اصدقاء , وفى اختيار الصديق لكل انسان اسلوبه فى الاختيار فانت تختار لك صديق يتفق معك فى الميول والأهواء ولامانع من ان تكون هناك اختلافات فى الاراء فان الاختلاف فى الرأى لايفسد للود قضيه ولكنك تختار الصديق الذى ان اختلفت معه لا يصير هذا مصدرا للمشاكل والقلق , ولكن هذا بالطبع لن يكون بالنسبه الى صديق صديقك فانك لم تختاره ولكن الظروف تفرض هذا ومع ذلك فمن الحكمه ان تتماشى معها وهذه سنه الحياه وهى الاختلاف لان الاختلاف موجود , ولكن قد يكون صديقك الوفا دارسا لشخصيتك ويعرف متى يجب ان يطرح الرأى ومتى يطرح او يعترض على الرأى الآ خر ولكن هذا لاينطبق دائما على صديق الصديق , فقد يكون هذا الشخص غير دارس لشخصيتك فبالتالى من الممكن ان يطرح اشياء ليست فى مواضعها , و للتقريب ساذكر مثالا عن صديق لى اسمه رجب انسان فاضل وصديق محب وجار طيب وانسان مثقف بالدرجه الاولى ويحترم الرأى والرأى الآخر واجده متفقا معى فى معظم ارائى ولامانع من ابداء الرأى بطريقه جميله فى ما لانتفق عليه , ولصديقى رجب هذا صاحب وليكن اسمه غريب , واذا بغريب يأتى الى يوما فيسألنى :

غريب : ياعم الدكتور انا عندى سؤال ليك محيرنى وعايز فيه اجابه ؟؟
وجيه : أأمر ياعم غريب سؤال فى الصحه ولا فى الشئون العامه ولا الخاصه ؟؟
غريب : لا هو سؤال تقدر تعتبره عام أو خاص أو دينى أو اجتماعى , حسب رؤيتك له .
وجيه : اسأل ياسيدى انا تحت امرك وياريت أقدر اساعدك .
غريب : انت شايف حضرتك احنا اهه مع بعض ذى الفل وعايشيين مع بعض فى محبه , مش كده ولا ايه ؟؟
وجيه : كده ونص يا استاذ غريب , وبعدين فين السؤال ؟؟ غريب : اصبر عليا مانا جايللك اهه . وجيه : معاك للصبح , ايوه وبعدين ؟؟

غريب : لما احنا بنحبكوا كده , ليه ما بتخلوناش نتجوز من عندكم ؟؟
وجيه : مين قال لك الكلام ده يا غريب احنا ما عندناش نص دينى بيقول كده , دى تصرفات بشريه خاصه .
غريب : يعنى انت مش ممانع ان المسلم يتجوز من مسيحيه ؟؟
وجيه : انا مش ممانع ان المسلم يتجوز مسيحيه اذا كنت انت ماتمانعش ان المسيحى يتجوز مسلمه !!!, وهنا فتح غريب فاه باستغراب ولم يجد اجابه وفهم ما أعنيه , ولكى ابسط الامر عليه قلت له :
وجيه : وبعدين القصه مش محتاجه التعب ده كله يا عم غريب يعنى هو عدد البنات المسلمات قليل علشان المسلم يتجوز مسيحيه ولا عدد البنات المسيحيات قليل علشان المسيحى يتجوز مسلمه , اعتقد ان المواضيع دى تافهه وفارغه لايجب التحدث فيها.
غريب : ولكنه الحب , اصل احنا بنحبكوا ….. وجيه : معلهش الحاجات دى لها نظم وقوانين ومينفعش تتنظم من طرف واحد ياحبيبى !!. ويأتى الى غريب يوما ثانيا ليسألنى :

 غريب : كل سنه وانت طيب ياوجيه .
وجيه : وانت طيب يا غريب .
غريب : داخليين على رمضان , مش ناوى تصوم معانا 
وجيه باندهاش : اصوم معاك ايه !! .
غريب : رمضان , كل سنه وانت طيب .
وجيه : آه !! , هو احيانا بصوم لغايه الساعه واحده الضهر .
غريب : وليه ماتصومش معانا للمغرب ؟؟!!
وجيه ضاحكا : معلهش , اصل المغرب بتاعنا الساعه واحده !!!.
وهكذا تجد مثل هذه الاحاديث الكثير والكثير واذا بى انظر فى كل واحده واجد صديقى رجب غارقا فى الضحك بصوره صعبه جدا , واذا بى انظر الى صديقى رجب قائلا :
رجب حوش صاحبك عنى !!!!.
كل سنه وانتم طيبين .

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع

http://www.copts-united.com/article.php?A=4792&I=130