طباعة الصفحة

عايز حقي

محبة مترى

بقلم: محبة متري
يا أّمّا أنا جاي لِكْ أقدم روحي
يمكن أّّوّفي بعض جمايلكْ
بس يا أمي تعبت وحاسس
أن الحمل زيادة عليَّ
يا أما بحبك مهما ظروفك
منعت أيدك عني شوية
أيوة أنا عاذرك بس بعاتبك
دة أنا حتة منك ضميني
عايز حقي في حبك ليَّ
من خيرك عايزك تديني

عايز حقي
عايز أشرب مية نيلك
نازلة صافية من الحنفية
عايز لونها لون شفاف
والألوان في الكباية تخاف
تعمل منظر أو تتشاف

عايز حقي
بصي الشارع ع الجنبين
عربيات تجري شمال يمين
بالفهلوة وحداقة ماشيين
سابق، أخبط، دوس بنزين
ميهمكش البني آدمين
مهما يروح هتلاقي تانيين

عايز حقي
عايز حقي في أني أعيش
والصحة من عند إلهي
لكن يوم ما أتعب أو أشيخ
ألقى الدوا من غير ما أعاني
ولا رجلىّ تدوب من اللف
والتأمين يصرفه مجاني

عايز حقي
عايز حتة خضرة جميلة
حوالين بيتي تعمل زينة
عايز أقوم من النوم أتنفس
أشم عبير ولا أشم تلوث
وردة ندية ونسمة طرية
ترد الروح
والشباك يفتح على شجرة
وأسقى الزهرة
تكبر تكبر تبقى جنينة
واسمع صوت عصفور بيزقزق
غنوة جميلة
ويرجعني صغير تاني
قلب بيحلم كله أماني
قلبي الأبيض كان يا ما كان
أما الآن
شايل كل هموم العالم
 مبقاش هوّ.... اتملا تجاعيد
والأحزان عمّالة تزيد

عايز حقي
عايز حقي لأبنى يا أمي
عايز أبني يعيش إنسان
ميعديش بتجاربي المُرة
ياخد حقه مهما إن كان
ولا يفضلش يخاف من بكرة
عايزه سعيد
يضحك قلبه ويا عيونه
يلقى في حضنكِ حب يصونه
وتعيشي ليَّ يا أمي الغالية
وتسامحيني لما أجيلك
عايز حقي.
(مع الاعتذار لأسم الفيلم الشهير) 

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع

http://www.copts-united.com/article.php?A=3584&I=97