طباعة
الصفحة |
 |
ماجد سمير
بقلم: ماجد سمير
الخنازير في مصر لمت بعض وطلعت على مجلس الشعب ووقفت معترضة على قرارات المجلس اللي مرة عايزة تعدمهم ومرة عايزة تدبحهم، ومعاهم نص تقرير منظمة الأغذية والزراعة اللي أكد كبير الأطباء فيها إن أن قرار مصر ذبح جميع الخنازير في البلاد هو "خطأ حقيقي" وقال جوزيف دومينيتش لـ "رويترز": لا سبب يدعو إلى ذلك.... أنها ليست أنفلونزا في الخنازير.. أنها أنفلونزا بشرية، مضيفاً أن الفاو تحاول الاتصال بمسئولين مصريين لكنها لم تنجح حتى الآن.
والخنازير بتفكر تعمل حركة معارضة تضمن عن طريقها إنها تعبر عن قرفهم من موقف البني آدمين المتعسف ضدهم على طول الخط وهايسموا حركتهم المعارضة "استكفينا" لأنهم على حد تعبير المنسق الإعلامي بتاعهم زهقوا من الناس اللي معيشة معظمهم وسط الزبالة والقرف وهما ما إعتراضوش على اللي حصل لهم، كمان البني آدمين يطلعوا جهلة ومش فاهمين حاجة!!
وحركة استكفينا للخنازير حسب تأكيدات المنسق الإعلامي للحركة ظهرت للحياة بعد سنين طويلة من الجهاد من أجل الحصول على الحياة الكريمة فعلى حد تعبيره ماينفعش الخنازير في الدول المتقدمة تعيش في نعيم وتاكل فاكهة ولبن العصفور، ومعظمنا هنا عايش العيشة الهباب دي وكمان مش عاجبين ولا كأننا نستحق العيشة والبني آدمين اللي بيتكبروا علينا هما السبب الأساسي في اللي إحنا فيه.
ولما ماطلعش حد يعبر الخنازير ومظاهرتهم غضبهم زاد جدا وقرروا الاعتصام لحد ما يتم الاهتمام بمطالبهم اللي هما شايفين إنها طبيعية وأقل حق من حقوقهم، وكمان هايلجأوا للمنظمات الدولية لحقوق الحيوان للتدخل لدى الحكومة المصرية لوقف أي قرارات خاصة بالإعدام أو الذبح، وكمان هايتم كتابة مذكرة فيها أن هناك صغار وعجائز من الخنازير المفروض الحكومة المصرية تراعي أوضاعهم وفي أخر المذكرة سؤال مهم جداً يكون له إجابة إذا كان قرار التخلص منهم صدر ولم يظهر خنزير واحد مصاب أمال في حالة ظهور حالة في الخنازير الحكومة المصرية هاتعمل إيه.
وصرح رئيس حركة استكفينا لوسائل الإعلام المصرية والعربية والعالمية متعجباً: مش معقول شعب متعلم غلط ومعندوش حريات كفاية سواء في الإعلام أو الحركات السياسية وأن الوصول للمناصب والمراكز القيادية في بلده أخر مقياس للاختيار ليها هو الكفاءة، وأكبر دليل الكلام لازال لرئيس حركة استكفينا إنهم قرروا يا إما إعدام أو ذبح الخنازير بالرغم من إن كل الحالات اللي ظهرت في العالم إصابة للبشر!!
وقام المنسق الإعلامي لحركة استكفينا للخنازير بإصدار تصريح آثار الجدل بين كل الجهات المهتمة بالقضية أكد فيه إن مش هايفضلوا كتير خاضعين لأفكار بتقول إنهم حرام شرعاً ومش معقول كل واحد بيحب يخلط الدين بالسياسية يظهر فجأة يقعد يتكلم على الحلال والحرام ويحطهم في خانة الحرام.
وختم كلامه وقال والله اللي مستحرم ياكل لحمنا بلاش ياكل، ومينتهزهاش فرصة وتحت بند حماية مصر من فيروس قاتل يقرر إنه يعدمنا أو يذبحنا ويتخلص منّا، ويصرخ وهو بيختم كلامه ويقول بجد إحنا استكفينا.
http://www.copts-united.com/article.php?A=2377&I=65