طباعة الصفحة

إيد النور يا عم

رمزى بشارة

بقلم : رمزى بشاره
إيد النور يا عم
خلِّى عَندَك دَم
طول ما الخُوف ده فيكوا وفِىَّ
أمخاخنا هَتِفضَل مَطفِيَّه
وأمَّا نبَطَّل نِبقَى هَفِيَّه
هِيقيد النُّور المَقطوع

1-
ليه تِستنى لحد ما يجى النور ويقيد
النور عايز حَد يجيبه كِده بالإيد
لو حابِب تِستَنَّى براحتَك. بس أكيد -
- هَتعيش طول عُمرَك ملطوع

الأحمال زايده ماهى زايده بقالها سنين
أنا مش عارف مين حِملُه زايد على مِين !
إنتى معايا وللا مع النَّاس التَّانيين
أنا يِظهَر فيكى مَخدوع

S :-
لِيه ياأمَّه سايبانى لجوزِك
وِمكَشَّره وبتِلوى فـ بُوزِك
مش باآلاقيكى لَمَّا باأعوزِك
أنا قلبى مِنِّك موجوع

السُّوس خَلَّى عَضمِك خَوَّخ
كل دى عَتمه دى حاجه تدَوَّخ
وِدَه شىء زاد عَن حَدُّه وبَوَّخ
خَلَّى الواحد بَقَى مَفقوع

2-
لِيه كل لُقمَة بتتغَمِّس كِدب وتَعتيم
غادة الكاميليا وأرمان دوفال بقوا من بَهتيم
و مفيش وَفاء حَتَّى ما بين الصُّحَبا الأنتيم
والعَتمه كاتمه على الموضوع

نفسى الهلال يطلع بَقى وِيبان الضَّى
وأمشى فـ طريق الجُلجُثة ولاأقولشى آى
ويكون لى حُرِّيَّة أكون مَيِّت أو حَى
مِن غير ما يتقال لى مَمنوع

http://www.copts-united.com/article.php?A=21759&I=541