طباعة الصفحة

قصيدة غزل في حب مصر

أماني موسى

بقلم: أماني موسى
يا مصر
يا حبيبتي يا مصر.... يا مصر يا أمي ... لا لا لا، لا مؤاخذة يا مصر أمي ماتت من عشر سنين، يا مصر يا خالتي يا مصر...
أنا بحبك أوي أوي يا مصر.... هو صح أنتي بتكرهيني ليه يا مصر؟ هو أنا مش ابنك ولا إيه يا مصر؟
يا مصر يا خالتي يا اللي حبك بيجري في عرقي، أصل دمي اتصفى يا مصر ومبقاش عندي منه إلا حبة قليلة فمش قادر أقولك بيجري في دمي يا مصر...
يا مصر أنا بحبك وعايز أقدم لك أي حاجة، روحي فداكي... قلبي فداكي... عقلي فداكي..... ولا أقلك يا مصر سيبك من كل دول وخدي جيبي فداكي.... أصله فاضي خالص يا مصر زي شوارعك! ومش عارف أملاه أزاي غير أني أهرب بملايينك برة يا خالتي وأسيبك لوحدك هنا في الغربة!! ولا أقولك يا مصر عندك 80 مليون غيري يقدمولك حاجة، هاتي جيبي بقى يا مصر أبوس إيدك.

يا مصر أنا أحترت أغازلك في إيه ولا إيه، كل ما فيكي حلو بس ناقص سكر حبتين.... عارفة أحلى حاجة فيكي إيه بتحلي أي شيء عينيكي تيجي فيه، قمر دة إيه اللي تتساوي بيه، لا سوري يا مصر دي أغنية لحماقي... هو أنا كنت بقلك إيه..... أه بصي يا مصر أحلى حاجة فيكي..... أستني بشوف أهو يا مصر بس مش لاقي الحقيقة.... عمومًا يا مصر أنتي حلوة عشان أنتي خالتي زي ما قلتلك.

بس بقلك إيه مصر عشان أقدر أحبك يا خالتي حاولي تلاقي لي أي شغلانة يا مصر أبوس إيدك، أنا ضيعت 16 سنة من عمري في الدراسة و16 زيهم على القهوة بشرب شيشة وسحلب يا مصر ومش فاضل غير 16 زيهم يا لحقت أتجوز يا مصر يا ملحقتش، أنتي حرة أنا بلغتك أهو، وشوفي بقى لو أي خالة مكانك كانت هتعمل إيه؟؟ متجوزيني بنتك يا مصر بدل ما تعنس؟ ولا أقولك بلاش، خليها جنبك وأنا هسافر أجيب تمن الشقة والمهر والعفش وأرجع نقرا الفتحة ونكتب الكتاب ونبوس ونموت وكفاية على كدة، مهو يا دوبك يا مصر هكون في أواخر الستين ومفيش نفس يا مصر.
بقلك إيه يا مصر.... أنا بحبك أوي والكلام معاكي مبيخلصش بس أعذريني يا خالتي الواد سيد سكسك بينادي عليا عشان أنزل معاه القهوة نشرب حجرين عالشيشة نظبط النوفوخ يا أمـــــــي... لما ارجع نكمل يا مصر....!

http://www.copts-united.com/article.php?A=18039&I=448