طباعة
الصفحة |
 |
د. وجيه رؤوف
بقلم: د . وجيه رؤوف
كان فيه زمان فيلم أسمه الستات ما يعرفوش يكدبو بطوله شاديه وباقه من الفنانين أمثال أسماعيل ياسين , وطبعا فى نهايه الفيلم عرفنا انهم بيعرفوا يكدبوا لكن كدبهم فى النهايه بيتعرف ,
لكن اليوم نفسى حد من المخرجين الكبار يعمل فيلم الرجاله ما بيعرفوش يكدبو ,
وده لأنه فى فيلمنا القادم لا ينكشف كذب الرجاله فى نهايه الفيلم مثل فيلم شاديه ولكن كذب أبطالنا مفقوس من أول الفيلم ,
نيجى لفيلمنا النهارده ومنتجه طلع كداب بسرعه كبيره جدا فبالرغم من أنه حقوقى كبير وفيه قوانين فى القضاء تم تشريعها بأسمه بالأضافه إلى أنه يرأس جهه من المفروض انها تلتزم بالصدق ولكن نقول أيه ؟؟
مسئولينا اليومين دول بقو كدابين كبار وما يعرفوش ينامو غير لما يكدبو فقد استحلو الكذب لأنفسهم طالما ثبتهم هذا الكذب على كراسيهم ,
قال هذا المنتج الكبير فى لقاء مع قناه البى بى سى بلغته الوديعه الطيبه إن ماحدث فى نجع حمادى نتيجه اغتصاب قبطى لمسلمه وقد ماتت الفتاه المسلمه متأثره بالأغتصاب !!
ويبدوا أن منتجنا الكبير نسى ان هناك اناسا تسمعه واننا فى عصر الفضائيات والنت وأن كذبه لن يطول ففى أقل من اربعه وعشرين ساعه تم كشف كذبته وظهر للعالم أجمع ان الفتاه مازالت على قيد الحياه وتتمتع بصحه جيده ,
فإذا بمنتجنا الكبير يراجع كلماته ويعيب على الناس فهمهم الخاطىء فهو يقصد أنها قد ماتت معنويا !!
سلامتها أم حسن على رأى عدويه
يعنى الراجل بيغلط ومابيكلفش نفسه بالأعتذار عن الخطأ وبيلقى عدم الفهم على المتلقى !! شوفتوا الحوسه ؟؟!!
أصلى الكذب ده بقى فن بس للاسف حتى فى الكذب فاشلين ,
طيب شوفتو الوزير الهمام اللى فى قعده صفى مع الأنبا بسنتى اسقف حلوان والمعصره قال للأسقف : الأقباط دول غاليين علينا وأحنا هنديهم كوته فى مجلس الشعب .
طبعا سيدنا الأنبا بسنتى الطيب صدق الراجل على طول وماحطش فى باله إن ده كلام سياسه ذى كلام الليل ذى الذبده يطلع عليه النهار يسيح ,
راح سيدنا صرح بالكلام ده للشعب ,
وصل الكلام ده للوزير فقال :أنا ما قلتش كده الكلام ده مش صحيح !!
طبعا الأنبا بسنتى سمع الكلام ده وده راجل دين مابيكذبش علشان الكدب حرام فقال : يعنى أنا باكذب!!
لأ يا سيدنا أنت ما بتكدبش , بس لازم تفهم الساسه وتعرف إن السياسه كلها كدب فى كدب وإنك لازم تعد صوابعك بعد ماتسلم عليهم ,
وفيه مثل قديم بيقول :
إذا كان رب البيت بالدف ضارب , فشيمه اهل البيت كلها الرقص ,
بمعنى إذا كان كبار الوزراء كذابين فبالتالى لا تستغرب أن يكون معظم الساسه كذبه فذلك طبيعى ,
ونيجى لأحد تلامذه منتج الفيلم وهو الغول الذى صرح أنه لاتربطه أيه علاقه بحمام الكمونى سفاح نجع حمادى , وإذا بجريده رسميه من الدوله تأتى بصورهم معا متقاربين إلى درجه لاتدعوا مجالا للشك فى ترابط العلاقه بينهم فتظهر هذا الكذب الذى يسيطر على الجميع ,
كما ان هناك سؤالا مهما : من المعروف أن الغول هو من تواسط للافراج عن حمام الكمونى كما يقول اهالى نجع حمادى , فلماذا تواسط للافراج عنه قبيل هذه المذبحه بعشره أيام فقط ؟؟!!
ونترك الغول ونذهب إلى الوحش أو الأستاذ نبيه الوحش الذى ذهب ومعه خمسه وعشرون محاميا للدفاع عن حمام الكمونى وحينما سؤل عن أسباب دفاعه عن مجرم قال : سأدافع عنه لأنه من حقه ان يكون له محام , وأننى قصدت من دفاعى عنه كشف خريطه الفتنه الطائفيه فى مصر ولكى اتأكد أن التهمه ليست بقصد طائفى ولو تأكدت انها بقصد طائفى فسأنضم للأدعاء ضده !!
وعلشان دى كمان سلمتها ام حسن
هى ناقصه أستخفاف بالعقول ولا حد قلكم اننا سذج بنصدق كل حاجه ,
عموما فيه آيه عندنا فى الكتاب المقدس بتتكلم عن النقطه دى وبتقول :
مبرىء المذنب ومذنب البرىء كلاهما مكرهه للرب .
ونسيب الغول والوحش ونروح للعوا .............
ربنا يرحمنا منهم جميعا ,
فالأستاذ سليم العوا واثناء توقيعه لكتابه الجديد وهذا الكتاب بعنوان ( الفقه الأسلامى نحو التجديد ) صرح بأن أحداث نجع حمادى أحداث فرديه وذكر ان قضيه وفاء قسطنطين وميرى عبد الله وسجنهما من قبل الكنيسه وراء هذه الأحداث ؟؟
كده العمليه بقت :
سمك – لبن – تمر هندى
الكل يلف ويدور ومش بعيد بعد كده يطلع لنا واحد يقول إن ثقب الأوزون هو السبب فى الأحداث الفرديه للفتن الطائفيه فى مصر ,
ويطلع لك البعض من كبار المسئولين والقياديين ليقول إن الخطاب الدينى المتطرف من الجانبين هو سبب هذه الفتنه !!
طيب ماشى : فيه خطاب دينى متطرف من بعض الأوصوليين ده الكل عارفه وبنسمعه ليل ونهار ومن الأذاعات المصريه المحليه اللى شغاله اربعه وعشرين ساعه وكلها بتزيد وتعيد فى : كفر من قالو إن ألله هو عيسى بن مريم ,
ألله يفتح عليك ,
ممكن حد يورينى أى فيديو كليب لأى قس مصرى داخل مصر بيشتم أو بيتهجم على الأسلام ,
بالطبع مافيش
وييجى شخص آخر مسئول برضه ويقول : زى مافيه جماعات مسلمه متطرفه , فيه أيضا جماعات مسيحيه متطرفه !!
إزاى وبأماره أيه ؟؟!!
عمركو شفتوا واحد مسيحى أخد سكين وراح يدبح حد قدام أى جامع ,
ولا عمركو شفتو أى مجموعه مسيحيه داخل مصر راحت تهاجم بناء جامع جنب كنيسه ,
عمرها ماحصلت ,
لأ ويطلع علينا شيخ جليل فاتح قناه شغاله له لوحده ويقول عدد الجوامع ناقص الناس بتصلى فى الشوارع وعدد الكنائس زايد عمركو شفتو مسيحيين بيصلو فى الشارع !!
دى نكته ولا أيه ؟؟!!
هما النصارى قادرين يصلو فى بيوتهم علشان يصلو فى الشارع يا مولانا ؟؟!! ,
ولا حضرتك مش واخد بالك من الفتن اللى بتحصل فى طول مصر وعرضها لما جماعه مسيحيين بيتجمعو فى بيت ويصلو مع بعض زى ما حصل فى كثير من القرى التى لاتوجد بها كنائس ( هو حضرتك ما بتقراش جرايد ولا أيه ؟؟)
ولا الغول يقولك فيه جامع مبنى جنب كنيسه مافيش بينهم متر !!
آه مافيش بينهم متر , علشان انتوا اللى بانينه
لكن يقدر المسيحيين يبنو كنيسه جنب جامع ؟؟ ده فى المشمش أو فى الهمايونى على رأى الوزير شهاب ,
ياريت علشان نحل القضيه لازم شويه صدق مع النفس وبلاش كذب ,
ومره صديق ليبرالى قالى : علشان القضيه دى تتحل لازم المسلمين هما اللى يحلوها , ولو ماحلوهاش المسلمين ألله فى سماه ما هتتحل .
وانا مصدقه ومش محتاجه حلفان منه ,
يبقى وصلنا لنقطه مهمه إن حل القضيه دى فى يد المسلمين وعلشان يحلوها صح لازم مصداقيه فى التحرى ,
لكن لو مشينا فى سكتنا دى بالمسكنات والكذب ولى الحقائق هتيجى على دماغ المصريين كلهم ,
فدعوه إلى التحرى الدقيق ودراسه المشكله بعيدا عن المصاطب والعمد لكى نصل إلى حل يعيد الأستقرار لهذا الوطن بعيد عن اطماع الغزاه من كل الأعراق .
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع
http://www.copts-united.com/article.php?A=13983&I=352