طباعة الصفحة

عجبـــي

ميرفت عياد

بقلم: ميرفت عياد
كترت مشاكلك قوي يا مصر..
فاقت وعدت كل حصر
وكل يوم يمر يزود..
رصيدها على اليمين صفر
عجبى!

بتطلب مني أعلن على الظلم العصيان..
واكشف الفساد يمكن يتعدل الزمان..
بس نسيت تقول لي أهم حاجة..
إزاي أقدر أصلب طولي وأنا جعان
عجبى!

أخدتك يا دواء على الريق ملهــوف..
مع إن القرب منك شيء مخوف..
بس الألم خلاني اتحوج لك..
حتى لو  قصرت أيامي وطويتها زي المظروف
عجبى!

آه من الحلم لما يتولد يتيم..
لا ليه أب عظيم..
ولا أمه قدرت تحميه..
من موته فى الجحيم..
عجبى!

على الرمال اتلاقت خطواينـا..
على الرمال افترقت خطواينـا..
 بس الأكيد ما بين اللقاء والفـراق..
ماتت حاجات كتير قوي فينـــا..
عجبى!

http://www.copts-united.com/article.php?A=13914&I=350