طباعة الصفحة

الأصل والصورة

ناهد صبري

بقلم: ناهد صبري
في أغلب الأحيان يختلف الأصل عن الصورة، لكننا في مجتمعاتنا العربية نريد لكليهما أن ينطبقا على بعضهما البعض، وألا نجد من يصرخ مطالبًا بتحسين الصورة.

وآه لو كان المطلوب تحسين صورتها هي مصر، فإذا حاولت أن تقرر شيئًا ما أو تفكر بحرية قيل لك "صورة مصر" لازم كله يبقى بالمسطرة.

أنا عايز أي حد يفتح أي فيلم تسجيلي علي قناة "الحرة" ويشوف الناس كيف تنتقد النظام السياسي الأمريكي مثلاً ... أو في بريطانيا عايز حد يشوف ما حدث مثلاً مع فضيحة حزب العمال الحاكم والاستقالات الجماعية ولم يقل أحد صورة بريطانيا.

إحنا بقى الطبخات بتاعتنا جاهزة

هناك بلدان تترجم سنويًا عددًا من الكتب يفوق ما يترجمه العرب مجتمعين .. ونحن مازلنا نردد نترجم كتب من أسرائيل ولا هذا تطبيع؟
في البلاد المتقدمة مفيش حاجة اسمها مواضيع لا يجوز الحديث عنها ولو فيه بتبقى باتفاق الأغلبية برضه.
وممكن حد يسيب كل حاجة حلوة ويمسك في حاجة صغيرة جدًا ويتعمل عليها فيلم.

لو تفتكروا من كام سنة الرئيس الامريكى كلينتون كان متورطًا في علاقة مع مونيكا، محدش جاب سيرة "صورة أمريكا" خاااالص، لكن الأصل في الموضوع هو المحاسبة والمساءلة والشفافية وبأي صيغة و بأي شكل وبأي الفاظ ( حد نسي البيه الرئيس كان بيشرح هي عملت إيه بالظبط ؟؟؟) اتفرجوا يا ناس شوفوا أي برنامج في التلفزيونات في العالم المتقدم وهو بيتريق وبيسخر من كل حاجة. فاكرين فيلم 11 فهرنهايت ومايكل مور ... محدش قال "صورة أمريكا"، فاكرين فيلم "حين ميسرة" و"هي فوضى" ... كلنا قولنا صورة مصر، أنا ضد فكرة الحفاظ على الصورة.

يعني الناس لا تتقن أعمالها وتجامل وتنافق وإذا طلبت محاسبة أو سؤالاً يبقي أنت بتشوه الصورة وما هو كله كده والدنيا ماشية ومش تعقد الأمور.

الحقيقه إن التقدم هو تحسين طريقة الحياة وليس تحسين الصورة.

التقدم يساوي حياة أفضل وصحة أفضل.
دلوقتي في علوم بتقيس كل حاجة وبتقيس حتي درجة الرضا والسعادة وإحنا الحمد لله طلعنا آخر دولة في العالم علي مقياس السعادة كمان، و في رأيي إن الحرية هي التي تصنع التقدم.

الحرية تعني أن لكل فرد أن يفعل ما يشاء طالما أنه في إطار القانون ولا سلطة لشخص أو دين أو لأحد على أحد.
يجوز أن مفهوم الحرية هو من المفاهيم التي تثير جدلاً وخاصة إذا تلامس مع بعض الأفكار أو الأديان أو بعض السلطات، إنما بقى اللي مش بفهم الاختلاف حوله وفيه هو التقدم.
في حاجة كده اسمها "العالم المتقدم" وفي مقولة أخرى "العالم الحر"
طبعًا هو مش عالم مثالي ولا وردي و لا هو الجنة وأنا لما بتكلم عنه مش بلغي ثقافتنا أو هويتنا، لكنه على أي حال أفضل من عالمنا القبيح.

http://www.copts-united.com/article.php?A=11823&I=303