طباعة
الصفحة |
 |
ماجد سمير
بقلم: ماجد سمير
رن التليفون المحمول سمعت على الطرف الآخر من الخط صوت بلهجة أهالينا في الريف يؤكد أنه عمدة كفر "الهنادوة"، تذكرت الشخصية الكاريكاتيرية الجميلة التي ابتكرها الكاتب الساخر العم "أحمد رجب" عليه السلام ورسمتها ريشة الفنان مصطفى حسين، سألني العمدة قائلاً: يا بيه هو الحكومة مش هاتعين وزير للنقل، ولا شايفين إنو مالوش لازمة، وللا يمكن مش لاقيين حد، أجبت على العمدة مؤكدًا أن مجلس الوزراء وكذلك رئاسة الجمهورية تسعى وتبحث بشكل دقيق جدًا حتى تصل إلى الشخص المناسب لشغل المنصب الرفيع، رد العمدة وقال: يا بيه رفيع أيه دا إحنا عايزين واحد يكون ملو هدومه وتخين ومربب وإبن عز، علشان يعرف يسوق دي وزارة لا مواخذه كلها سواقة.
ابتسمت من كل قلبي وأجبت عليه يا عمدة كلمة رفيع مش معناها إن رفيع وجسمه ضعيف دي معناها أن منصب وزير النقل مهم جدًا، لا يا بيه أنا عارف إن الحكومة عايزة واحد ما يكونش تخين علشان الدنيا بتكون زحمة ودا راجل هايكون مسئول عن الموصلات يعني لا موآخذة هايتنطط هنا وهنا، وأضاف "العمدة" إن الواد "إبن أبو سويلم" أبو لسان زالف بيقول إن وزارة النقل دي المفروض تكون مسئولة عن حاجات كتير منها نقل لا موخذة الدم لأنها زي ما بيقول والله هو مش أنا -يقصد إبن أبو سويلم- إن الوزارة دي بالذات دونًا عن كل الوزارات إتسببت في إن دم كتير يسيل من المصريين سواء على سكة القطر أو على الأسفلت كمان دي وزارة، وأكد مرة تانية إن الكلام لإبن أبو سويلم أصل لسانه زالف قوي يا سعادة البيه ودايمًا يرمي كلام عليها ويقول إن ما بيعيشلاهاش وزراء أبدًا، وأوضح العمدة أنه لو من الحكومة تخلي الوزير اللي يتولى مسئولية وزارة النقل يلبس خرزة زرقاء أو يجيبوا وزير أصله لا مواخذة خواجاتي عيونه تبقا رزقاء علشان يتمنع عنه الحسد ويعيش، وضحك وقال لي مش تقول لي "رفيعًا".
جددت توضيح الوضع مرة أخرى أنه بعد حوادث القطارات والطرق وغيرها يجب أن يتولى حقيبة الوزارة رجل له تاريخ وخبرة في مجال النقل والموصلات، فرد العمدة بسرعة شديدة وبصوت كاد أن يخترق طبلة أذني، أنا وقعت من السماء وانت إستلاقتني يا بية، أخويا الصغير معاه شهادة عالية، المعهد اللي درس فيه كان في الدور الرابع وعنده خبرة عالية جدًا في مجال النقل والموصلات، قلت له: خلاص يا عمدة هاشوف الموضوع دا، قال ضروري يا بيه دا شيء مهم قوي وفي مصلحة البلد وأخويا دا هايفيد مصر جدًا طالما الموضوع بتاع وزير النقل لازم يكون عنده خبرة، سألته مباشرة أنت عايز أخوك يكون وزير النقل يا عمدة؟ فقال فورًا أيوة يا باشا لأنه خبرة عالية جدًا في المجال دا بقا له أكثر من 12 سنة بيتشغل في السكة الحديد "كمسري".
http://www.copts-united.com/article.php?A=10154&I=266