ناس وناس

بقلم / القس  سامى بشارة جيد
الناس معادن يا بية
ناس معدنها ذهب
وناس معدنها نحاس
ناس كلامها عجب
وناس كلامها رصاص
ناس وعدها سيف
وناس كلام فى كلام وخلاص
ناس تبوس القدم
وناس على الإيدين تنباس
ناس عريانه مهما الغوالي لبست
وناس توب البر أحلى لباس
ناس شعارها أنا وبس
وناس عايشة لخير الناس
ناس تدى من غير حساب
وناس تكوش وتحوش
تاكل وتشرب كاس

ناس تحب غيرها من غير سبب
قلوبها مليانة دفء وذوق وحماس
ناس متعمل حساب الكلمة تدبها
وناس كمل رقة وادب واحساس
ناس تتعامل معاها
زى عصير القصب
وناس فاضية وناشفة
زى المصاص
ناس مهرها غالي
وتمنها أغلى
وناس رخيصة تبيع نفسها
تمنها قرش فضة أو شهوة فاضية
تبيع ولأى واحد نخّاس
ناس منظرها حلو
والقلب مليان أحقاد وغيرة مرة
من أخمس القدم ولحد هامة الراس
من بره هاالله هاالله
ومن جوة عظام أنجاس
ناس تضحك فى وشك
ومن وراك تطعنك

تقول وتعيد
تعيد وتزيد
نميمة وإشاعات
وأفكار شرير وسواس
الإبن زي الأب والأم زي البنت
ما هو أصل العرق دساس
ناس طبعها خشب
جهل وغضب
وناس قلبها ميزان حساس
عمران حكمة وفهم
زى ما بيقول المثل
العلم في الراس
في البيت الأدب
الإيمان العامل بالمحبة
مش في الكراس
والأسرة كنيسة يا بية
يا مذبح يا مذبحة
وابن الوز غطاس
وعلى كده يمضي قطار البشر
ناس اكسبريس وترسو ناس

ولكن زي الأم ما لقيت
دفء وحنان
صدق وإخلاص
تطلع من الجافى حلاوة
وتعمل من الأحمق حكيم
زي الربان في البحر غواص
تسهر وتدي
تعطف وتهدي
أتاري الأم
أجمل وأحلى الناس
ليها جوه القلب معزّة
في نن العين مكانها
ومكانتها فوق الراس
الجنة تحت أقدامها
عطاء وتضحية حب وإخلاص
كتابي وصاني وأمرني أكرمها
وكلام ربي خير مناص
ووعدني بطول العمر
زي يسوع ما أكرم مريم
طوبها واتولد منها للخلاص
كل سنة وكل أم طيبة
ويا كل بنت ويا كل ابن

اكرم أباك وأمك
أهلك ياتهلك
أمك ثم أمك ثم أمك
تتاقل بالدهب
وتتوزن بميزان حساس
دى وصية
ولكلام ربنا
مفيش مساس
أصل البشر أشتات
ناس وناس
ناس غاب
وناس ماس
فيه ناس ولاد إبليس
وناس ولاد ناس

ناس زى البخار سريعاً تختفي
وناس زي الشمس أبداً ما تنطفي
أصل البشر تراب وطين
ومنهم أقمار وأشماس
وتبقى الأم صدر حنون
فانوس مضيء وشمع وناس
مليون تحية لست الحبابيب
أغلى وأعز الناس