كل سنة وانت رئيس حكومتنا

بقلم: فيولا فهمي
كل سنة وانت طيب يا دكتور نظيف، بقالك في منصب رئيس الوزراء خمس سنين مروا علينا زى الكابوس المتين، قلت هخليها حكومة "ذكية" لكن اتضح أنها عقدت النية على منافسة هاني رمزي في فيلم "غبي منه فيه"، وقلت هنحولها حكومة "إليكترونية" لكن للأسف أسلاك الإنترنت اتقطعت والأعطال استمرت، وقلت هتبقى الحكومة "الرشيدة" لكن يبدو أن رشيدة لم يكتب لها الحياة في مصر، ولم نراها سوى في مسلسل الأطفال "بكار"..
ودلوقتي من حقك الإحتفال بمرور خمس سنين على منصبك الجديد وإنجازات حكومتك الحديد، خمس شموع في تورتة الوطن بخمسين مصيبة أحلت بالبلد..
في عبّارة الموت أفواج من البشر بدون تأمين وفي البحر غرقانين..
وقدام أفران العيش صفوف صفوف ومش مهم يموت عشرة أو حتى ألوف..
المصريين في الخارج إهانة وتعذيب وأوضاع مهينة وحياة كلها رذيلة..
أسعار غالية ومفيش رقابة على الأسواق، ترخص في كل العالم وعند المحروسة ترفع شعار "الغلاء"..
هجرة غير شرعية بالجملة والشباب من يأسهم بيرموا نفسهم في مصير زى الهباب..
بطالة وفقر كمان وكمان، وإحساس بالقهر والحرمان، ومرتبات من زمن فات لا بتزيد بحوافز ولا مكافآت..
إعتصامات وإضرابات وكأننا في عصر الإحتلال، وأحزاب متجمدة في الثلاجة ومدونين في المعتقلات..
أوبئة وفيروسات ومفيش أدوية أو أمصال والأوضاع في المستشفيات تجيب الأمراض والحميات..
وقائع فساد في جميع المصالح والقطاعات الحكومية، وصلت للركب في المحليات والوزارات..

مبارك علينا وجودك معانا خمس سنين في الفقر والقهر عايشين وعقبال خمسة زيهم تانيين، بصراحة المفروض نحمد ربنا على أفضالك علينا وكفاية إننا عايشين وشايفين رؤساء حكومات بيتغيروا علينا، حتى لو الواحد منهم هيقعد على قلبنا 10 سنين.