لهطة القشطة

بقلم: ماجد سمير 
"وكأن الموضوع ناقص كمان الأحصنة مش كفاية علينا الخنازير" عبر المواطن المهموم بشئون الوطن عن قلقه الشديد على مصر بعد قراءته خبر صحفي يفيد أن مصر تتعرض الخيول فيها لمرض الأنفلونزا، وأضاف بعد أن أعتدل في جلسته ونظر لي مبتسمًا: يا أستاذ دي حاجة "حدوة" خالص، مش معقول دة إحنا بقينا ملتقى كل أنواع الأنفلونزا، وخبط بيده على الترابيزة لدرجة أن كوب الماء الموجود عليها كاد يسقط لولا أني نجحت في إمساكه في لحظة وقال: الظاهر أن الفيروسات ناوية تعمل ائتلاف مرضي ويمسكوا الحكم هنا، وسحب نفس طويل من السيجارة وقال بعد أن أطلق سحابة دخان كثيفة من فمه: زمان كان الوضع زي ما قال عادل إمام بلد شهادات صحيح، دلوقتي بقت بلد فيروسات وتجهم وجهه قائلاً: الحكومة المفروض تعمل خطة خمسية جديدة يكون شعارها الأساسي مضاد حيوي لكل مواطن.

قلت له بعد أن طلبت من واحد شاي بالنعناع أحضره صبي المقهى بسرعة غريبة جعلتني أتعجب من السرعة الجبارة: دة كمان فيه مشكلة الجمال اللي جاية من السودان فيها مرض، قال: هي الأمراض دي مش "هاتخُف" شوية علينا، دي مشكلة كبيرة يعني الطيور اللي جاية من أوربا فيها أنفلونزا، كمان الناس الأجانب بيجوا من مصر ومعاهم أنفلونزا الخنازير، قلت له دة غير الفيران والبراغيث اللي بتجيب طاعون من ليبيا، قال لي: دة حصار بقى، من كل حته في مرض، أكيد دي مؤامرة على مصر ودة باين جدًا لأن صحة المصريين مستهدفة والمصري لو صحته بقت حلوة وقوي هيعمل قلق لأعدائنا اللي مفيش وراهم غير التآمر علينا ليل ونهار وبيصحوا الصبح مفيش وراهم غير التخطيط لهدم قوى الوطن تحت شعار الخطة الاستعمارية القديمة حان الآن موعد التآمر على مصر.

نظرته له بغيظ شديد، وقلت له مؤامرة إيه يا عم أنت هو أنت مش هتفوق من اللي أنت فيه دة، وأضفت بعد أن أمسكت كتفه بعنف جعل عدد من رواد المقهى الجالسون بالقرب منّا يراقب الموقف بتركيز شديد، فرد بعد أن أنزل يدي من كتفه، إحنا يا باشا عايشين وسط دول كلها بتتآمر علينا فعلاً، قطع حديثه رجل أربعيني يجلس على الترابيزة المجاورة لنا يأكل طبق كشري بنهم شديد موجهًا حديثه لي: أيوة يا أستاذ المؤامرات شغالة علينا الله ينور، نظرت إليه قائلاً إزاي بقى، فقام وجلس بجوارانا وهو ممسك بعلية الكشري ووضع ملعقة كبيرة جدًا في فمه وأكمل كلامه وهو يمضغ بقوة: هو أنت مشفتش ماتش الأهلي في ألمانيا لما الحكم العنصري طرد أحمد السيد من الملعب، وكمان الكابتن حسام البدري قلت الحكم بقى عنصري لأنه طرد لاعب ومدرب الأهلي من الماتش مين اللي قال كدة، فأجاب بعد أن طلب كوب ماء وشاي وشيشة والعرق يتصبب من كل جسمه بسبب الكشري المعبأ بالشطة وخلافه، اللي قال الكلام دة الكابتن مجدي عبد الغني في قناة النيل للرياضة، ودة راجل بيتكلم لغات ولعب في أوربا وعارفهم كويس وعارف هما قد أيه عنصريين وبيكرهونا.

شعرت أن رأسي يكاد أن ينفجر، فقلت له عندك حق ومجدي عبد الغني أصدق مني، فلو لم يقم الحكم بطرد اللاعب والمدرب ربما فاز الأهلي بالمباراة والحكم خاف من تأثير الفوز على الشعب الألماني الذي سيطلب الفور الحصول على الجنسية المصرية والانتماء للنادي الأحمر صاحب الصيت ويتركوا كلهم ألمانيا ويلجأوا للمعيشة في مصر تصبح ألمانيا وطن بلا شعب وتفوز مصر بأموال الألمان ونسائهم الشقراوات الجميلات صاحبات البشرة البيضاء مثل لهطة القشطة.