فاكسات مهاجر

بقلم: مدحت عويضة
حسني مبارك:
المرأة حصلت على كوتة والأقباط يا عيني في حوسة.

أوباما:
بقالك ست شهور تخطب وتلتّ وتعجن.. تسمح تقول لي إمتى تبطل كلام وتعمل حاجة واحدة عملية؟

فتحي سرور:
إبسط يا عم.. ثُمن المجلس هيبقى ستات علشان الدورة الجاية من المنصة تشوف الماء والخضرة والوجه الحسن.

حبيب العادلي:
بعد تعدد صدور أحكام جنائية على ضباط الشرطة, أنصحك تتفق مع عادل إمام يعمل فيلم (كباتن خلف القضبان).

الإخوان المسلمين:
تصفيقكم الحار لأوباما ثم رفضكم لما قاله بعد يوم فكرتني بقفشة القرد إللي قال نكتة لقوا الحمار تاني يوم بيضحك عليها!!!

نتنياهو:
لو قبلت بحل الدولتين هنغير اسمك من (نِتن-ياهووو) إللا (فُلّه-ياهووو).

حسن نصر الله:
بعد خسارتك للإنتخابات أقول لك.. السح الدح إمبو ما تدي لبنان للحريري أبوه.

فتح وحماس:
لقد نجحتم في تقسيم الفلسطينيين والعرب لفتحاوي وحمساوي وضاعت القضية يا ولدي.

زاهي حواس:
أوباما شاف صورة فرعون يشبهه, وحياتك شوفلنا مين الفرعون الخلبوص إللي سرح لغاية كينيا!!!

حسن شحاتة:
علّي صوتك بالغنى... لسة الأماني ممكنة ممكنة.