اقتباس

بقلم: دميانة اقلاديوس
ياللى بتقول على كلامي اقتباس انت عارف يعنى إيه اقتباس؟..
يعنى كلمة زي كلمة وحرف يزق حرف بس خالي من الإحساس..
ممكن تسمع نصيحتي ولو سمعتها هتكون أروع شاعر حساس..
وللا كاتب مثقف مرموق وإنسان حقيقي لا يقترن بك الخطأ بمساس..
قوم بسرعة هات قلمك واسند ورقتك على الكتاب..
سجّل ودوّن اللي بيحصل من مهازل على الأعتاب..

سجل مشاعرك لمّا..
لمّا تشوف طفل شريد نايم على الأرض جعان..
وللا كنيستك تتحرق وتشب فيها النيران..
وللا تفشل في حل قضية وتبقى عاجز حيران..
وللا يتغدر بيك من صديق كنت في حبه هيمان..
وللا لما يخبط على بابك شخص مسكين غلبان..

سجل ودوّن مشاعرك..
لما تشوف المهانة يحصلّها انشطار..
من حكومة غاوية تعذبك ليل ويّا نهار..
وفي كل محافظة وبلد الدماء أنهار أنهار..
لمّا تلاقي في عربيتك قنبلة مستعدة للإنفجار..
لمّا اختك تتخطف وبينها وبين حياتك تختار..
لمّا تيجى لجنة تموتك ويكون ده أخطأ قرار..

يا عزيزي
ولو جبنا كل الأوراق وسندناها على الكتاب..
مش هنقدر أنا وانت نسرد المهازل اللي على الأعتاب..
بس لما تسجل بمشاعرك وكيانك الحساس..
عمري أبدًا ما هقول عليه دا اقتباس..
لكن أنحني ليك وهاكن ليك أروع إحساس..