خـنزيـر حــزين

بقلم: نشأت عدلي
خنزير وعايش في حالي
مال الناس بقى ومالي
أنا مش بعّدي حد وشوفوني
دة أنتوا يا ناس اللي بتعّدوني
عايزين تفرحوا بموتي
ومحدش قدّر يا ناس سكوتي
لا بهش ولا أنش وقاعد في حالي
مالكم بقى يا ناس ومالي
طب أنتوا ناس متعصبين
مالي أنا ومال الدين
بربطة المعلم اتفقتوا تقتلوني
محدش شاف دمعة عيوني؟

غلابة كتير براعيهم
أديهم لحمي يغذيهم
دي زبالتكم هىَّ غذايا
محدش بياكلها ويايا
منضف ليكم كل مكان
هاقول إيه لمخ تعبان؟

لما أنا نجس ساكتين ليه
ماتحركتوش من زمان ليه
ولا هىَّ الفرصة لما تيجي
تموتوا الكل وزي ما تيجي
صدقوني إحنا مش عيانين
بس بقينا منكم تعبانين

عايزين تحاربوا الأقباط
بالأصول ناقشوهم يا أعباط
مش أكون أنا كبش فداكم
وتخلوا العالم يقول ما أغباكم

إحنا فرحانين إننا هنموت
الناس اللي هنا بتتمنى الموت
كل الناس بتقول إني سليم
بس يا خسارة مخ ناسنا هشيم
ذنب الغلابة في أيديكم
ودمنا اللي سال بأيديكم
هينادي ويصرخ بعلو الصوت
اندبحنا ظلم ومن غل مكبوت