أحلم وحقق

بقلم: منال بولس
أيوة لازم نحلم علشان نعيش ونعيش صح كمان... لكن لازم يكون لحلمنا سقف لأن إيه الفايدة لو فضلنا نحلم ونحلم ونطلع لسابع سما وفجأة نفوق من الحلم ونلاقي نفسنا بنصطدم بسابع أرض؟؟
يعني مثلاً لو نفسك تبقى مليونير احلم الأول بمية ألف ولما توصل لهم تبقى تحلم بالمليون.. ولو عايز تبقى دكتور احلم الأول إنك تجيب مجموع في الثانوية العامة (تانية وتالتة) ولو نفسك تطلع القمر احلم الأول أنك بتركب طيارة... ولو نفسك تبقى حاكم مدينة احلم أنك بتحكم نفسك الأول.. هي الحسبة كدة خطوة خطوة.

الحلم سهل لكن الصعب تحقيقه.... أنت كل يوم ممكن تحلم يعني عندك 365 حلم في السنة بس هل ممكن تحققهم كلهم!؟

صعبة شوية.. لأ دي صعبة كتير.. لكن لو الحلم له سقف هتقدر تبتدي فيه بخطوة كل يوم فتكون حققت 365 خطوة في كل حلم حلمته على مدى سنة ودي مسافة مش بطالة أبداً للوصول لتحقيق الحلم، ولكن لازم تلتزم الجدية في اتخاذ الخطوات دي كل يوم.

الموضوع عايز إصرار لكنه مش صعب لو توفرت له الإرادة.... هي الأحلام كدة عشان تتحقق لازم لها إرادة وإلا هتفضل حبيسة عقولنا وبس.

وفي النهاية الحلم حق مكفول للجميع ولكن مع أول خروجه من قفص العقل يصبح ملك للإرادة والظروف والمعوقات اللي ممكن تقابله.... بس ما تخافوش احلموا.... مين عارف؟!

كلمة أخيرة: احلم يا صاحبي بصوت عالي خللي اللي حواليك يسمعوك... عشان لو يوم كسلت عن حلمك تلاقيهم به بيفكروك... ولو يوم وقعت في طريقه يجوا هم ويسندوك... لكن أوعى يا صاحبي لا يكونوا هم اللي وقعوك!