باحث في التراث والمصريات : أغنية " ست تريزا وجوزها بشاى" تعبر عن المحبة والتسامح

كتب: عماد توماس
قال الباحث في التراث وعلم  المصريات واللغة المصرية القديمة، ومخرج أغنية "شعب واحد مش شعبين" وأغنية " ست تريزا وجوزها بشاي"  الأستاذ عصام ستاتى لــ"الأقباط متحدون" أن
الفن محرك أساسي وله دور كبير في تأصيل الوحدة الوطنية والتسامح، مستشهدا بدور الغناء الوطني  في حرب أكتوبر الذي كان عاملا مهمًا في وجدان الجنود والشعب، بالإضافة إلى لعب الغناء الشعبي  دورا مهمًا في كل مراحل التاريخ، مضيفًا ان " الفن هو الحكمة إذا ما صدق التعبير، ونحن شعب نحس بالكلمة الصادقة ونتفاعل معها".
ورغم عمل ستاتى في الإعداد للتلفزيون والإذاعة المصرية من الخارج، ومشاركته في تقديم  عدد من البرامج والأفلام التسجيلية وعمله كمحترف إلا انه  يعتبر نفسه يمارس هواية محببه لقلبه وعقله.

وحول أغنية " ست تريزا وجوزها بشاي" التي قام بإخراجها، يؤكد على أن فكرتها هي الوحدة الوطنية و المحبة والتسامح . والأغنية من كلمات هاني الحبالى ولحن محمد سعيد وغناء محمد مراد وتقول كلماتها :

ست تريزا وجوزها بشاى ... عزمونى على حفلة شاى

عم بشاى كان لسه مقدس ... ومعلق فى رقبته صليب

رحت الحفله عطونى ملبس ... والبتيفور والشاى بحليب

ســـت تريزا طيبه خالص ... وبتحلق شعرها جرسون

عندها ابن مؤدب خالص ... دكتور بيطرى واسمه ريمون

كان فى التخته بيقعد جنبى ... كان فى الماتش بيلعب جون

ياما لعبنا زمان ع البسطه ... ياما ضحكنا كمان بجنون

فـاكر مره بطـحته فى راســـه ... غصبن عنى واحنا عيال

شـده ابـويا فى حضنه وباســه ... واخده وطار ع الاستقبال

صاحبى ريمون كان ياخد العاده ... ويعلق على بيته فانوس

بعــد صــلاة العيــد نتمــرجح ... عم بشــاى يدينـا فلــوس

ســـت تريزا ( تبل ) الترمس ... وتاخدنى مع جورج وتادرس

عند العـدرا فى عيـد الخـوص ... امى الحـــاجه تطفى وابورها

تغرف صحن وتجرى تزورهـا ... وتطبطب على كتفى تقول لى

شوف وصانا رســولنا ازاى ...

ســـت تريزا وجوزها بشاى .. عزمونى على حفلة شـــــــــاى

لمشاهدة الأغنية انقر هنا