انا مفكـر..!!

بقلم : ياسر يوسف غبريال
( اهداء الى اولئك المفكرين الذين يملأون حياتنا كلاما ويجعلوها اكثر ظلاما )
انا مفكر
وعقلى كبير
 يوزن عشرة
من الدنانير
يسارى
يمينى
خدام الامير
وممكن ابيع دينى
واشتغل لكلابه غفير
وبلقطة ع الشاشة
تشترينى
باحب اتكلم كتير
يا مين يداوينى
من داء التفكير
ياللى وهبت الناس العقل
وحرمت منه جنس الحمير
الناس بيلمونى
على كلامى الكتير
وبيهاجمونى
اكمنى مثير
خلقتنى
موقعاتى
مولعاتى
عايش على عرق لسانى
وبيع كلماتى
واللى زى حالاتى
مفيش منه كتير
ما نا مفكر كبيرررررر
وخطير
تقولوا شمال
اقول يمين
ولو انصلح الحال
اقول مساكين
ولو شفت جرح
العب فيه بالسكين
وازعل فى الفرح
وافرح فى الزعلانيين
واصعب سؤال
انا ليه ؟
انا مين ؟
ايوة
انا مفكر متين
بافتى فى الكورة
وشئون الدين
والمطبخ كمان
لو عايزين
واهم حاجة افضل فى الصورة
مفروض ع الملايين
يوماتى تلاقينى
فى برنامج ولا اتنين
يا سلام
البلد لو فيها منى اتنين
كانت ولعت
بالفكر طبعا والكلام الرصين
وعليه العوض يا مؤمنين
عرفت انا مين ؟
انا جمال التفكير
وكمال التعبير
كلامى ليه لمعة
لا تقولى سمعة
ولا ابو لمعة
التفكير دا صنعة
وانا صنايعى نبيل
حتى لو دمى تقيل
ناعم و حنين
مش هتحس بالاسفين
فكرى تاعبنى
ياللى سامعنى
بلاش تحاسبنى
معلش الطبع غالب
وكلامى كله مقالب
عليكوا اسد غالب
وع الحكومة
ارنب من الارانب
لسان المفكر
ما يتعدلش
ولو علقوا فيه قالب ..!!