آه يا بلدي وألف آه !!!

بقلم : أندرو جبرائيل
هي فوضى ، ولا احنا اللي فاكرينها فوضى يا ناس ؟؟!
هي مـاتـت ، ولا احنـا اللى قتلنـا فيهـا الاحساس ؟؟!
منظر شفته ومنسهـوش ، دم الشـرف منـداس !
ليه يا بلدي ؟ ليه يا شعبي ؟ نسيت العزة والتراث ؟؟
نسيت انت مين ؟ نسيت حريتك فين ؟؟ نسيت الأساس ؟؟!
صورة حركت كياني ، صورة الفوضى يا ناس !
آه يا بلدي وألف آه !!!

الواقع صحيح مر !! لكن ايه يكون الحل قول ؟
سكوتك خلى الكل ينهش ، زي الغول
واللى يلحق ينهب , وبيسرق اللي يطول
والحق بقى باطل , والباطل بقى مقبول !
وكل ده لسكوتك .. لخوفك .. يا مسطول !!
سندك هو الله وضهرك العلي يلا قول .
آه يا بلدي وألف آه !!!

أوعى تستنى الزعيم والبطل الهمام
ولا فارس وعلى الفرس شادد اللجام
انت البطل ، انت الفارس ، بإيدك تحقق الأحلام
حكمة سمعتها ، امسك شمعة ، وأوعى تلعن الظلام
مش مطلوب منك ثورة ، ولا شعارات الكلام
قوم بدورك ، وكلمة "لأ" للظلم قولها بالتمام
آه يا بلدي وألف آه

في موكب المطرفين لو جاز التعبير
هيقولوا عليك مجنون وهتسمع إهانة كتير
لكن يا ترى هتختار الحمل التقيل ولا اليسير ؟!!
لو عايز ينداس حقك ، يبقى اتنازل عن التفكير
لو عايز ينداس شرفك ، جنب الحيط سير
لو عايز يتقتل ابنك ، عيش للظلم أسير
آه يا بلدي وألف آه