حكايات .. ألف نيلة ونيلة .. !!!!!

بقلم : نبيل المقدس
 الموضوع من بدايته نيلة ... صدقوني إللي إخترع الكلمة دي .... يستاهل مني حَبات بِليلة .... عموما سامحوني أن أكتب حكاية من حكايات  ألف نيلة ونيلة ... عايزكم تربطوا الأحزمة عند قراءة هذا الموضوع النيلة .... وأحكموا أنتم إيه إللي يتصادر من الرقابة أو تترفع عليه قضية من العسكر " قال إيه " اللي بيحافظوا علي الأخلاق النبيلة ! ... أهي حكايات ألف ليلة وليلة , أم حكايات الف نيلة ونيلة . ؟؟

 كنت نايم علي السرير هادئا ً , وسارح في دنيا الجمال , وإذ التليفون يضرب ... قلت : يا دي النيلة ! إيه القلق ده ياحبيبتي ... هو وقت كلام ومحادثات !... أصلها بتحبني جدااا ... رفعت السماعة لقيت أحلي صوت أحببتهُ واعشق صاحبتهُ ... قمورة زي العسل ... قالت لي : ياجدو بابا بيقولك ماتنساش تجدد البطاقة ... قلت لها : يا دي النيلة ! هو لازم يعني ... عموما ,انا ما أرفضش ليكي طلب يا أغلي من عيني ... ردت عليّ وقالت : يادي النيلة , أهه بنسمع كلام وبس ..!!
 
أصلها شقية ومايعجبهاش العجب , ولا حتي الصيام في رجب ... صحتني مقصوفة الرقبة ... نزلت من علي السرير ... ولمحت جهاز النت ( الراوتر) فاصل , قلت : يادي النيلة ! هو النت علي طول فاصل . دخلت الحمام أتشطف , فتحت الحنفية ... لقيت الماية نازلة عليّ زي الشلال .. رحت بسرعة دعكت رأسي بالصابونة وفجأة لقيت المَيّة إنقطعت , قلت : يادي النيلة !
 
خمس دقائق وراسي تحت المَيّة , لما جَتْ المَيّة بسرعة غسلت وجهي وراسي ... و جريت جري علي المطبخ من غير ما انشف راسي و قلت دي فرصة المَيّة موجودة و أملأ الكنكة عشان أعمل الشاي ... يادوب بافتح حنفية المَيّة لقيتها قطعت ثاني , قلت : يادي النيلة !. غيرت هدومي وشربت الشاي , ونزلت ورحت علي طول إلي مكان العربية ... لقيتها مزنوقة بين عربيتين مش ممكن زحزحة اي واحده فيهما ..قلت : يا دي النيلة !. عموما مكان مكتب السجل مش بعيد .. اروحها ماشي .. منها رياضة ومنها  مش هشيل هم ركنتها قدام السجل المدني . إفتكرت أن الموضوع سهل.. يادوب  أعطيهم البطاقة القديمة علي إيصال إستلام , وأرجع.

     دخلت مكتب السجل المدني ... لقيت طوابير  طويلة , قلت : يادي النيلة !. وقفت في إحدي الطوابير ... بصيت لقيت اللي قدامي ماسك  ورقة ... قلت له : الورقة دي ليه ؟ ... قال إنت لازم تشتري إستمارة طلب من الشباك ده ... بصيت للشباك ده لقيت قدامه طابور طويل ... قلت : يادي النيلة !. وقفت في الطابور و جِه دوري وإشتريت الإستمارة ... ملأت الخانات بالكامل ...

رجعت للطابور الأولاني تاني من أول وجديد .. وقلت : يادي النيلة !. بعد نص ساعة تقريبا , وصلت للشباك وكم كنت فرحان ... يادوب بقدم الطلب , لقيت الموظفة قامت وقالت لي لحظة .. قلت : يادي النيلة !. صدقوني ربع ساعة لما سيادتها جت وفي إيديها كباية شاي وساندوتش فول ... قلت : يادي النيلة ! هو ده وقته وانا اساسا ما أكلتش وجعان ... بَصِتْ في الطلب ... وبعد تفحيص ... قالت لي اتفضل تروح تختمها من النقابة ... قلت لها ليه ؟ البطاقة القديمة مكتوب المهنة مهندس ... قالت لي بشخط وبشفط بُق من كباية الشاي ... هو انت هتعلمني شغلي ؟؟؟ طلعت من الطابور وقلت : يادي النيلة !,معناها  لازم اروح النقابة . أخذت بعضي وقلت اوقف تاكسي بسرعة والحق أخذ عربيتي واروح النقابة ... يادوب دخل بي أول الشارع العمومي بتاعي  , ولقينا الشارع واقف ... قلت : يادي النيلة !. ربع ساعة قاعدين في الحر .. قلت أخذها مشي افضل ...

نزلت من التاكسي , ناولته عشرة جنيه .. قال معنديش فكة , قلت يادي النيلة !. أخذت بعضي الف علي المحلات عشان افكها والعربيات واقفة .. فكيتها ورجعت له تاني واديتله حسابه , اخذتها مَدْ لقيت العربية بتاعتي لسة مزنوقة وواقفة جنبها عربية شفط المجاري الضخمة . قلت : يادي النيلة !. مافيش فايدة اروح بالمترو ... وعشان اوصل لأقرب محطة لازم أمشي محطة اوتوبيس , وانا ماشي لقيت نفسي قدام مركز النت , قلت بالمرة ادخل ادفع اشتراك النت ... لقيت مافيش حد قدام الموظف . إنشرح صدري  لأني وجدت نفسي  اول واحد في الطابور لا حد قدامي ولا حد ورايا ... لقيت الموظف  يبتسم لي , وقال لي خمس دقائق ... النت واقف , قلت : يادي النيلة !. بس بيني وبينكم فرصة أنا لوحدي علي الشباك , المهم النت جِه , لقيت حوالي عشر أنفار زقوني أتاريهُم كانوا قاعدين علي الكراسي  وقالوا لي احنا منمرين نفسنا , إنت آخر واحد , قلت : يادي النيلة !. نص ساعة خلصت المأمورية , وعلي مترو الأنفاق مباشرة , قطعت التذكرة بسرعة , قلت الحمد الله ... يادوب وصلت الرصيف ... لقيت المترو وصل ... ووصلت النقابة بقدرة قادر ... أشكرك يارب . 

دخلت النقابة و سألت قالوا لي عند فلان رحت لفلان , بيني وبينكم تمتمت الصلاة الربانية في سري , عشان ربنا يسهلها , وفيها إيه كل الناس ماشية تتمتم وتحرك شفايفها ... منهم بيقرا سور قرآنية ... ومنهم بيتكلموا في الموبايل اللي متشعلق علي الودان ... ومنهم إللي مخهم ضرب من الغلا وماشيين يكلموا نفسهم . لقيت الموظف قال لي : ادفع 20 جنيه .. اعطيته المبلغ ثم اعطاني إيصال , وتَنّحْتُ قدامه , قال لي سيادتك عايز ايه ؟ قلت عايز اختم الطلب : قال لي عند الموظفة علانه إللي قاعدة آخر الكاونتر ... قلت : يادي النيلة !. لمحت مالقتش حد قدام الموظفة علانة ... أخذتها جري ووقفت قدامها ... اعطيتها الطلب ... قالت لي بأدب جم : معلهش خمس دقائق ... الكمبيوتر واقف ... قلت : يادي النيلة !. وقفت خمس دقائق , وبعد ما جه النت , بسرعة كتبت البيانات من علي الشاشة , وقالت لي ... كده موضوعك انتهي ... إتفضل عند المدير عشان يختم لك الطلب ... صدقوني أخذتها رهوان وعلي حجرة المدير ... أدخلت راسي من بين الباب , لم اجده ... تقابلت مع الساعي ... قال لي ... راح يصلي وجَيّ حالا ... قلت : يادي النيلة عليّ !!. وقفت ربع ساعة ... وصل سيادة المدير , وبعد ما جلس علي مكتبه قدمت له الطلب ... ختمه .. قلت الحمد لله . 

خرجت من النقابة لقيت السنترال جنبي ... قلت أدفع فواتير التليفونات بالمرة , وخصوصا علي ما سمعت أن سنترال رمسيس فيه شبابيك كثيرة للدفع , يعني مافيش زحمة ... دخلت السنترال , وانا عندي علم بالمبلغ , لقيت كل الشبابيك تقريبا فاضية , وقفت في طابور واحد منهم , بعد دقيقة إكتشفت ان الكمبيوتر واقف ... قلت : يادي النيلة !. الغرض بعد شوية إشتغل الكمبيوتر, دفعت حوالي 500 جنيه , اصلهم 3 فواتير . وخرجت من السنترال جري , أخذت تاكسي , قلت له علي سجل المدني الوايلي يا اسطي ... ويادوب خلص ميدان رمسيس , لقيت الشارع حائط سد ... قلت : يادي النيلة !. بعد نص ساعة  وصلت قرب المنزل , وبصيت في الساعة ... لقيتها وصلت واحدة ونص قلت بلاش اكمل تقديم الطلب النهاردة , اخليها بكره ... نزلت قدام عربيتي ... أفاجيء انها واقفة لوحديها علي الرصيف ... ومطلعة لسانها لي ... وبتقول لي  تأخذني بمزاجي مش بمزاجك ... ضحكت وقلت : يادي النيلة عليكي انت كمان !!. 

ذهبت إلي مكان عملي ... وجدت الموظف منتظرني ... أعطيت له مفاتيح المحل ... ويادوب بعد ما فتح ... لقيت رجل بشنطة ... قلت كويس أه أول زبون وصل .... لقيته بيقول لي ... أنا فلان الفلاني من الغرفة التجارية ... عايزين منك 530 جنيه رسوم السجل ... صرخت باعلي صوت أقوووول  : يــــا دي النيلــــــــة !!!!! 
ايه رايكم .. مش حكايات الف ليلة وليلة ألطف وافضل من ألف نيلة ونيلة ..... أمال ليه عايزين يحجروا عليها ؟؟