باحلم بالكرسـى ..!!!

بقلم : ياسر يوسف غبريال
باحلم  بالكرسى
والكرسى عالى
قوايمه فضه
وضهره من الدهب الغالى
وتحته اسد رابض
وانا فقير حالى
قالوا هات جواب من الوالى
لا الوالى نفع
ولا سهر الليالى
ولا اللى دفع
وقال اشتريه بمالى
ازاى تملا العين
وانت يا عينى خالى ..
+++++++++++++
باحلم بالكرسى
كرسى ابويا
ما انا بلياتشو
ملون وشى بشوية بويا
كدة ابتسام
كدة اهتمام
كدة روحانية
يا سلام
وارجع اغرق فى الرؤى والاحلام
واحلم تانى بالكرسى
والكرسى فتنى
كل يوم
ياكل حتة منى
ابات احلم
اصبح متهنى
الكرسى عمره ما كان بالتمنى
ولا للى مقضى حياته مستنى
الكرسى صليب كبير
خدها حكمة منى
+++++++++++++
باحلم بالكرسى
والكرسى ليه تاج
وانا من زمان محتاج
اشوف الناس حواليا افواج
وانا ماسك العصايا العاج
واعيش ايامى بالابتهاج
مسكين
الكرسى مش بالكرباج
+++++++++++++
باحلم بالكرسى
الكرسى واحشنى
بس اتمكن 
وساعتها مين هيحوشنى
اقعد عليه يومين واموت
مش عاوز حد يدوشنى
انت فاكر هتكون مبسوط
ولا احلامك هتهوشنى
دا اللى يقعد عليه لازم يكون مظبوط
يا اما ياخد عصاته ويمشى ..