دفتر أحوال

بقلم: أشرف فايز
الشتا دخل البيوت
أكل اللحاف والدنيا برد
والفقر عشش ع الحيطان
والعيشه سد
الكل راكع ف الطابور
ولاحد راضي يمد إيده يا ناس لحد
………………..

 لملم رغيف العيش وجع قلبه ..
و قدم التماس
ولا حد رد
إشمعنى عِز كل يوم
بيعلي في سعر الحديد
الطاق طاقين
ومافيش حساب
علشان كده
جاله اكتئاب وكش خالص
عاد يادوبك لقمتين
.......

الحياه صبحت جحيم
وآدي ألف سين
مش لاقية جيم
والحل أصبح معتقل بقانون غريب
ورجال حبيب مسكوا البلد
أستغفر الله العظيم
أستغفر الله العظيم
........

اتبرعوا يا أهل الإيمان
إعلان
على كل الكنايس والجوامع
في الميدان
هات م الآخر
طب إزاي أنا أصبح مؤمن
والجوع كافر؟!
...............

العجوز قال لا يجوز
الشعر الأبيض يوم يبان
طب والسنان؟
البلع سهل
 والطقم لازم يبقى حل
.......................

من ييجي كام مليون سنة
معصورة عصر
من ييجي كام مليون سنة
محصورة حصر
وعشان تفوق
طب ييجي كام مليون سنة
عاوزاها مصر؟؟؟
................

  آآآآه البلد
 مسجونة جوه نفسها
رافضة تفارق أمسها
طب مين ياناس ها يحسها؟!
وحارسها خوفها ويأسها
............

من ديوان المهر حرية