عيون الحقيقه

بقلم: د.وجيه رؤوف
آه يا عيون الحقيقه لما تنظرى
وبقلب مليان مراره تنزفى
هى دى الحقيقه ولا ده سراب بينجلى

لما الأخو بيقتل أخوه وهوه بينحنى
بيقتله وهو بيصلى ,فى بيت ربنا بيحتمى
أقول أيه على قلب قاسى ,رحمه ربنا من قلبه بتختفى

أقول أيه وهو بعيد عن ربنا وفاكر بالقتل قلبه ينجلى
آه لو عرفو الحقيقه , وإن اللى بيعمل كده فاسد مفترى
أقول أيه على دم طاهر سفك على أرض بيها بتتروى

وآه ياعيون الحقيقه لما تنظرى
على ولادك لما اتاخدو غدر فى ليله العيد
كان نفسهم يفرحو وهما لابسين لبس جديد

وفى الكنيسه كانو بيرنمو  للمولود المجيد
ماكانوش دريانين إن الشيطان مستنيهم وفى قلبه حقد أكيد
كلهم فى عمر الزهور شباب قلبه مليان بحب المجيد

وآه يا عيون الحقيقه لما تنظرى
كدابين  ومزورين للحقيقه وهى للكل واضحه جليه
ومحرضين مؤيدين للقتل , بيعتبروه  للسماء عيديه

فاكرين ربنا يفرح بالدم على  إيد عصابات شقيه
ولا محامين قتله فاكرين نفسهم دفاع عن الإنسانيه
آه يا زمن خلو فيه الإله زعيم قتله و إنتحاريه

وأصحاب العزوه  للقتله مؤيدين و استشاريه
وآه يا عيون الحقيقه لما تنظرى
فعل العزيز المقتدر وهو للحق ناصر

دم شهدائنا مش هيضيع هدر لإن الرب ناظر
وارواح شهدائنا فى الفردوس مع رب قادر
وأكليل لكل شهيد وسط السماء ظاهر