مالناش غيرك يا رب.. أوبريت جديد لشهداء نجع حمادي

كتب: عماد توماس - خاص الأقباط متحدون
من كلمات الشاعر الفنان رمزي بشارة المستوحاة من اجتماع الصلاة الذي عقده أبونا مكاري يونان بعد جريمة نجع حمادي، وكان يُصَلِّى ويصرُخ إلى الله بدموع قائلاً: مالناش غيركَ، كتب بشارة كلمات أوبريت جديد أهداه إلى شهداء نجع حمادى بعنوان: (مالناش غيـرك) من ألحان وتوزيع وإخراج/ حاتم منير وأداء كورال قناة "الحقيقة" تقول كلماته:
رافعينلك يا إلهنا صَلاة
مالناش غيرَك يا الله
وِعَشان إنتَ الحَق ضَروري
العَدل هَيَاخُد مَجراه
 
لو حَقِّنا مَهضُوم أو ضاع
صَلَّح مِن تانى الأوضاع
بِدمُوع عيننا جينا تعيننا
مالناش غيرَك نِترَجَّاه
 
- اشفي لنا قلوبنا المَكسُورَة
عَزِّي أي نفُوس مَقهُورَة
صَبَّرنا على اللي جَرى لنا
في نَجع حَمَّادي وبَهجُورَة
 
أطفال لابسين لِبس جديد
راحوا يصلُّوا فـ ليلة العيد
مِن غير ذَنب إتقَتلوا يا عالَم
دَه يرضي مين وبإيه هَيفيد
 
- وآدى أُم وحاضنه الصَّندُوق
بتقول لابنها مالَك فُوق
جَهزت لك الأكل بإيدي
قُوم وإرجَع وَيَّايا ودُوق
 
لِبسَك مالُه الدَّم مَلاه
دَه أنا لِسَّه حالاً كَوياه
مالك ساكِت وما بِترُدِّش
صَعبانَه علىَّ يا وِلداه
 
- دول سِتَّه غير الإصابات
قُولوا كفايه للعِصابات
أنا مِن حَقِّى أعيش بكرامتي
ويعيش فى سَلام الأقباط
 
سَلِّمنا أمرِنا في إيديك
والظَّالِم سايبينُه عَليك
إحنا سامِحنا إللى ظَلمنا
اتصَرَّف زَي ما يرضيك
 
- مش هَنقابِل نار بالنَّار
ولا عايزين ناخُد بالتَّار
عايزينك تيجى تعَزِّينا
وِتشيل مِنَّا أي مَرار
 
مابِتنعَسِّش ولا بِتنام
وكلامَك مش بَس كلام
قُلت مُبارك شَعبى فـ مَصر
إبعَت تانى لمَصر سلام

رافعلينك يا إلهنا صلاة ملناش غيرك يا الله

لمشاهدة الأوبريت لمستخدمي الفيس بوك انقر هنا