من وحي أغاني فيروز) ) -1- إحكيلي

بقلم: زهير دعيم
أبو سمعان : 
يافاوي يا بُردقانْ
أبو صُرّه ملك الزّمانْ
بلون الشّمس 
بطعم الهمس
من سلّة أبو سمعان
يافاوي يا بردقان             
قَرِّبْ وشوف 
اليافاوي...  تعال وطوفْ
قْطوف...قْطـوفْ

سوْسَنه : 
يا عمّي.......
يا عمّي يا بو سمعانْ
صباحَك ورد وبيلسان
وخُصله من شَعَر نيسان
إفتح لي هالسّلّه
وإفرد لي هالغلّه
وبيعنا من خير الرحمان

أبو سمعان :            
شو هالحَلا
شو هالطلّه
شو اسمِك إنتِ يا فُلّه
قوليلي  قبل ما الشّمس 
تشوفِك......
وتتخبّى ورا التّلّه

سوْسنه : 
سوسنه أنا...سوسنه أنا
من بلاد الريح وبلاد النوى
مِن جبل الغيْمِ الأزرق
مِن عِطر خدود الزنبق
من الاوضه المنسيّه
خلف قصيده محكيّه
مزنّره بالحُبّ متكيّه 
عَ دْراج العيد
يا زائري البعيد
سوسنه أنا...
في كلّ صُبح جديد
بتنطُر اللّي راحوا 
ونسيوا المواعيد