الحصانه البرلمانيه أساس الفساد فى مصر

بقلم: د.وجيه رؤوف
بيقولك يا عم مش هايقدرو يحققوا معاه , ليه ؟؟
أصله حصانه                                     
بيقولك ياعم ده مش بيتاخد غرامات فى المرور  , ليه  ؟؟
أصله حصانه                                       
بيقولك ياعم ده كل عيلته بتمشى بالألى , وهو معاه كذا سلاح إلى وبدون ترخيص , والحكومه متسالوش ليه , ليه ؟؟
أصله معاه حصانه                                    
بيقولك ياعم ده يدخل من الجمارك وماحدش يقدر يفتح شنطه ولا يفتشها إن شاالله يكون فيها مخدرات , ليه ؟؟
أصله حصانه                                          

بيقولك اللى معاه حته أثار وعايز يستفاد منها بقرشين يوديهاله  وهو هيتصرف فيها ويديك اللى فيه النصيب , لأن الحكومه ما بتسالوش , ليه  ؟؟
أصله معاه حصانه
بيقولك ده يقدر ينقل اى موظف او مسئول حتى لو كان شريف , لإن المحافظ بيعمل له ألف حساب وبيخاف منه , ليه  ؟؟
أصله معاه حصانه                                    
جبار ومفترى وبيفترى على خلق الله واستولى على أراضى كتيره بدون وجه حق , والأهالى مش قادرين عليه ومش قادرين يشتكوه , ليه  ؟؟
علشان معاه حصانه                                    
قرايبه كلهم شغالين فى السلاح والمخدرات وتهريب الأثار , ولما بيتقبض عليهم بيطلعهم ذى الشعره من العجينه , ليه ؟؟
أصله معاه حصانه  
وكتير كتير غير كده  بلاوى   , والسؤال هنا اللى متجاوب عليه سابقا , ليه أعضاء مجلس الشعب بيصرفوا ملايين على الأنتخابات والدعايات ؟؟

البعض ممكن يقولى وجاهه أجتماعيه  وأنا اقولك : لو النايب مش عارف انه هايجيب قد اللى صرفه اضعاف المرات مش هيصرف ولا قرش صاغ واحد ,
ونيجى كده بالراحه ونتكلم واحده واحده  ,
طبعا الكلام اللى هأقوله ده ماينطبقش على كل نواب البرلمان لأنه لاننكر وجود نواب محترمين شرفاء داخل البرلمان  ولكنى اتكلم عن نواب الفساد ونواب القروض ونواب المخدرات ونواب الأسكان ونواب الفتنه الطائفيه وأخيرا نواب القمار  ,
بسم ألله ماشاء الله , ماخلوش  ركن فساد فى البلد الا ودخلو فيه  واصبحوا من علاماته ,
طب أيه اللى خلانى اجيب سيره اخواتنا البعده دول دلوقتى , يا حفيظ يا حفيظ   و يجعل كلامنا خفيف  عليهم ,
 كثرت فى الفتره الأخيره الحديث عن نواب فى البرلمان وراء أحداث مذبحه نجع حمادى  وإن لم نتأكد من ذلك مائه بالمائه , ولكن !!

مالذى يحمل أعضاء المجلس الموقر على أتخاذ مساعدين لهم من أرباب السجون والمسجلين خطر على الأمن العام ,
ومالذى يدعو عضوا فى سيد قراره لكى يسعى بنفوذه وسلطانه لكى يتم الأفراج عن معتقل مسجل خطر شقى , لكى يرتكب هذا المسجل خطر جريمه مذبحه نجع حمادى بعد الأفراج عنه بعشره ايام ؟؟
أسئله كثيره ولكن يجب ان تسأل حتى نضع النقط على الحروف ,
ولنوجه ملحوظه ثانيه : لم تحدث فى قطر مصر بطوله وبعرضه احداثا طائفيه لم يكن وراء منها بعض نواب المجلس الموقر والجميع يعرف هذا وأولهم  جهاز امننا الجليل ,
والسؤال هنا : ماهى وظيفه نائب البرلمان خارج البرلمان ؟؟
والأجابه التى نعرفها جميعا هى مراقبه الأجهزه التنفيذيه فى اداء دورها القانونى المنوطه به ,
يعنى ايه بالعربى الفصيح   , يعنى مراقبه مركز الشرطه هل بيؤدى واجباته فى تنفيز القانون والا لأ ؟؟ وبالتالى مراقبه باقى الأجهزه على نفس الأساس ,

طب وهل ده فعلا اللى بيحصل  ؟؟
لأ  وبالعكس , النواب هما اللى بيعرقلو اداء المهام المنوطه للشرطه , إزاى يعنى  ؟؟
أهم حاجه تهم نائب الدائره هى عدد الأصوات  وبالتالى رضاء اهالى الدائره حتى لوكان رضاهم سيأتى على القانون ودوره ,
فمثلا بسم الله ماشاء الله  ممكن تلاقى نايب الدايره رايح يخرج واحد عليه أحكام ذى موضوع نجع حمادى او واحد تانى اتمسك فى حته افيونه   او واحد اتمسك فى حته آثار  وناخد منه حته الآثار  ونقوله عيب  ومتعملش كده تانى  , ويروح بيتهم ,
هنا تحولت العمليه من مراقبه الجهه التنفيذيه إلى منع الجهه التنفيذيه من  تنفيذ احكامها ,
بالأضافه إلى المواضيع التانيه من تهريب المخدرات وتهريب السلاح وكان ابرزها قضايا نواب سيناء ,
طيب هل اعضاء الكونجرس فى امريكا لديهم حصانه اعضاء برلماننا ,
للأسف دول غلابه ولا يملكو نصف حصانتنا  بل على العكس ده ممكن ضابط المرور يوقف الوزير وياخده مخالفه ,
طبعا دى سلوكيات الدول المتحضره التى تختلف عن بلادنا التى تسلك سلوك القبائل المتخلفه للأن ,

ولذلك وللأسف انا أجد أن أحد أسباب الفساد فى مصر هى تلك الحصانه التى تجعلهم  يرتعون فى البلاد فسادا شرقا وغربا  ,
ولذلك فعلى الدوله إذا ارادت أن تجعل من هذا الوطن وطنا حضاريا يصون قيم المواطنه  فعليها الغاء الحصانه من على النواب جميعا وان يصيروا امام القانون كاى فرد  وليكن القانون وسياده القانون اولا واخيرا.