دم حلف ما ينشف

بقلم: نشأت عدلي
أنا رايح نجع حمادي
رايح أطل على ولادي
صناديقهم لسة مفتوحة
وجروحنا لسة مفتوحة
ونفوسنا لسة مجروحة
أوع تقفلوا الصناديق لحد ما أبوس كل جبين
أخد من دمة كحلة وأكحّل بيها العين

أااااه يابلد داست على كل القوانين
دي الآه موجوعة ومخلوطة بحزن وأنين
الطلقة مش في قلوب الشباب
دى في قلوب كل الملايين
حضنوا الرصاص زي العاشقين
دخل في قلوب لسة خضرا
وصعدت نفوسهم في زفة العرسان
بس سابت في القلب كسرة
وفي القلوب وجع وألم مليان
        

مشيت في الشارع أنادي
تعالوا لحضني يا كل ولادي
دست في الطريق على دم بيصرخ
ويقولي حاسب دا دم أغلى الغوالي
دا دم سال في يوم ليلة عيد
في ليلة فرح ومولود جديد
صوت الدم فزعني وقتلني
ولونه قاني حزين وجرحني

الدم بكى وقال اعذرني
الرصاص دخل وخرّجني
خرجت من قلوب فرحانة
وسِلت على كل العيون التعبانة
خرجت من القلوب وانا تعبان
سِلت من عيون مليانة أمان
أااااااااااااااااه سامحني يابني
صدقني كان غصب عني
الخسة والغدر هما اللي خرجوني
صدقني ياغالي بكت عليك عيوني

ياولادي تعالوا في حضني
مشتاق أضمكم ما بين دراعاتي
عايز أحطكم جوه ضلوعي
مش مكفياني كل دموعي
نفسي أشيلكم جوه نني عيوني
أاااه ياحُرّقة القلب عليكم
أاااه ياشوق النفس ليكم