بقلم: نبيل غبريال المحامي
أثناء نومي حلمتُ بأنني في السماء في حفل استقبال شهداء نجع حمادي، يوم عيد الميلاد 7/1/2010، وهم من الأقباط ،وعسكري حراسة الكنيسة، وجميعهم يرتدون ثيابًا بيضاء، واستقبلهم الطفل المرحوم/ محمد علاء مبارك، ودار بينهم هذا الحديث:ـ
حفيد مبارك: "حمد الله على السلامة .. وإيه اللي جابكم هنا؟ أنتوا اتحكم عليكم بالإعدام عشان ارتكبتوا جريمة في الكنيسة يوم العيد".
الشهداء: "الله يسلمك، لا إحنا كنا بنصلي واتقتلنا بمدفع رشاش.
حفيد مبارك: "ليه كنتوا بتصلوا في كنيسة بدون ترخيص؟".
الشهداء: "لا أبدًا الكنيسة مرخصة .. بس اللي قتلنا إن الكنيسة في اليوم دة كانت فاضية من الأمن غير كل عيد، ومحدش من القيادات الأمنية جه عشان يهني سيدنا الأنبا كيرليس الأسقف بتاعنا بالعيد، وفي مجرمين - الحكومة بتقول 3 مسجلين خطر- موتونا زي الفراخ بمدفع رشاش، وقالوا عشان ندفع جريمة شخص تاني - هتك عرض فتاة- بس إحنا مالنا، وكمان بيقولوا دي لعبة سياسة بين واحد مشتاق لكرسي مجلس الشعب، وعاوز يخلص من الأسقف كيرلس، عشان هو كان السبب في نجاح العضو الحالي، وكلام كتير.. بس إحنا ذنبنا إيه ندفع ثمن الضعف الأمني والإهمال والتعصب الديني والجهل وعدم قبول الآخر، واللي بيزيد في مصر والخطاب الدينى والتعليم والإعلام وعدم تنفيذ القانون والصلح العرفي الخطأ في جرائم الدم.. وده كلة غلط.. ومحدش بيعالجوا، إلا لما تحصل مصيبة، وكام يوم وترجع ريمة لعادتها القديمة".
حفيد مبارك: "وإنتَ ياعسكرى مالك زعلان ليه؟"
العسكري: "أصلى أنا اتقتلت وأنا واحد من حراسة الكنيسة، وزميلى الشهيد اتقتل وهو على الحدود بين مصر وفلسطين، بس معرفش ليه مصر أطلقت عليه شهيد وتعملوا وقفات احتجاجية وتكريم من الدولة والفنانين وأنا لا؟ مع إننا إحنا الاتنين مسلمين، وأنا أعرف أن الموت أثناء الخدمة العسكرية شهادة".
الشهداء: "ياريت تكلم جدك حسني مبارك يلحق مصر بدل ما تبقى زي لبنان.. إحنا مبسوطين أن إحنا طلعنا السماء وإحنا شهداء في المسيحية، بس ياريت تقوله يلحق باقي شعب مصر .. ياريت توصله صوتنا وتقوله دمنا غالي بس فداء لمصر، كلها مسيحي ومسلم، وقوله صلح التعليم، ويمنع التمييز بين المواطنين، ويعلم الأطفال قبول الآخر والتسامح، وميخليش حد يكفر الثانى، ويبيح حرية العقيدة في مصر.
حفيد مبارك: "أنا حالاً هبعتله رسالة وأكيد هتوصله، أصل أنا وهو بنحب بعض أوي، وانتوا إخواتي لما كنا في الأرض، ودلوقتي في السماء، وهقوله ياجدو اسمع الناس، ومتزعلهومش، علشان الناس بتزعل لما تتكلم ومحدش يرد عليها، وياريت دي تكون آخر عملية إرهابية في مصر".
حفيد مبارك: "هو ليه ياجدو عمو حبيب العدلي لسة وزير الداخلية بعد اللي حصل هو عشان قريبنا؟ اعزله ياجدو.
الكاتب: وأخيرًا صحيت من نومي على صدى صوت يتردد من حفيد مبارك للشهداء ثلاث مرات – الرسالة وصلت - الرسالة وصلت - الرسالة وصلت.
الحلم خلص |