زائر م السما

بقلم: إيهاب شاكر
علي ارضنا كل يوم بيتولد طفل جديد
لكننا ما يهمنا نعرف في يوم اصل الوليد
م الشرق ولا الغرب ولا م الاحرار او العبيد
كلهم شكل واحد دمهم لونه واحد
حتي لو عن بعض بعيد
ده لان الاصل واحد
ده لان الاب واحد
ورثوا منه شيء وحيد
الخطية

شجرة فاسدة ومرض عنيد
بان ثمرها من يوم دخولها للخليقة شر وغم
لما الاخ غدر بأخوه لما الارض سقاها الدم
والنجاسة والشراسة بقت طبع بدون ندم
ومرت الايام والحال هو الحال
نحاول بالمباديء والاخلاق وده شيء محال
والسما تطل من فوق وتبكي مطر
علي بني ادم علي جنس البشر
علي ذا السلسال
وتقول امتى ييجي مين يحطم الاغلال

وجه رسول معاه ناموس يمكن يغير العالم
قعد يقول ان الطقوس هي اللي تحكم بني ادم
لكنها ومع انها سامية وعالية عن اللازم
كشفته و فضحته وطلبت انه يتحاكم
وفضلنا نحلم بنهاية وحلم تاني ببداية
بداية تانية لجنسنا واصل تاني غير اصلنا
لحد لما الانبيا قالولنا جاي مننا
مين هيحيي جنسنا
ده مننا ومش مننا
ليه شكلنا ومش طبعنا
اتنبأوا وقالوا عنه انه مشير اله قدير
اتهيئوا يا بشر للقاه ده اللي جاي بالتحرير
ده اللي هو البر نفسه
ده اللي فيه الروح ولابسه

هتصدقوا يا بشر هتخدوا قوة للتغيير
والكلام جالنا صعب علي ودانا
وفضلنا نستنى مين يشرح المعنى
والصبر طال بينا والسما بتتأنى
وعدت الايام ونسينا احلامنا
السما سكتت عن الكلام
ولا انبيا ولا رؤى ولا احلام
وكل واحد يعمل اللي شايفه تمام
لا اله لا ملوك لا قضاة ولا حكام

لكن في يوم اتولد طفل ما في زيه مثيل
وسمعنا صوت م السما صوت ملايكة بالتهليل
السما اتكلمت السما اعلنت
ان اسمه عمانوئيل
والمجوس جم بشوق لما شافوا النجم فوق
قالوا فين ملك اليهود اللي لسه يدوب مولود
جم وسجدوا للطفل دوه اللي اسمه اسم يهوه
قدموله م الهدايا اللي يرمز للحكاية
موت وصلب وف النهاية
خلاص للي يقبل الهِدايا

وفجأة صوت صارخ جانا م البرية
قال انا جاي ادلكم على قدوم المسيا
ده اللي قبلي صار قدامي ده اللي يدي الحرية
هو الخلاص هو الطريق هو الحياة الابدية
والنهاردة جايين نعيد بس عيدنا شكل تاني
مش ملابس جديدة نلبس ولا حتى كمان اغاني
جايين نقدم للرب  بدل المزود القلب
وانت ياللي سامعنا ايه هتقدموا للملك
اللي طالبه هو منك انه يبقى مكانه قلبك
خد قرارك واكتب بايدك تاريخ ميلادك
وميلاد المسيح في قلبك
يبقى هو سيد حياتك
يبقى هو الاله وربك