أحمد شوبير للإخوان: باسم يوسف مسح بيكم الأرض

علّق الإعلامى أحمد شوبير على هجوم التيارات الدينية المتمثلة فى جماعة الاخوان المسلمين والسلفيين من خلال القنوات الفضائية على الاعلامى الساخر باسم يوسف قائلاً:" ادعوا إلى الله بالموعظة الحسنة بدل ما كل قنواتكم الفضائية اللى للأسف تسمى قنوات دينية لا يشغلها سوى أن تشتم وتسب فى باسم يوسف بالساعات.

 

وأكد شوبير أنه تابع الحلقة الماضية من برنامج باسم يوسف "البرنامج" واندهش من ابداع وأسلوب باسم يوسف فى الرد عليهم وقال:" باسم عرض عددا كبيرا من الفيديوهات للإعلاميين المنتمين للتيارات الدينية عبر قنواتهم الفضائية اللى بتشتمه وبتكفره وبتقول عليه بيدعو للشذوذ وكل يوم يجلسون فى حلقاتهم بالساعات ولا يوجد لديهم سوى السب والتجريح فى شخصه، ولكن باسم يوسف فى خلال عشر دقائق فقط مسح بيهم الأرض وخلص عليهم كلهم ".

 

وأضاف:" هو باسم يوسف عملكم ايه؟ ماتسيبوه فى حاله هى دى طريقته وأسلوبه ما هو اتريق عليا وعلى الزميلة لميس الحديدى وعمرو اديب وإعلاميين كتير ما حدش عمل زيكم كده ليه. والمفروض انكم تدعوا بالحكمة والموعظة الحسنة بدل ما تشتموه . وانتم متفرغين لباسم وبس وكل ما تتتكلموا عليه هتخسروا لأنه دمه خفيف وأنتم دمكم تقيل أوى بصراحة ودى حاجة بتاعة ربنا والناس بتحبه. وتابع :" انتوا تيجوا تتريقوا عليه يمسخركوا، وفى مثل بيقول تيجى تصيدوا يصيدك.. وهو بالبلدى علم عليكوا كلكوا واحد واحد زي التلاميذ."

 

واختتم شوبير حديثه: باسم يوسف ما شاء الله عليه تم اختياره من مجلة تايم الامريكية ضمن اكثر مائة شخصية مؤثرة فى العالم، لأنه اعلامى شاطر وناجح وبلغتنا احنا فى الكورة "حريف" وانتم لسه بتتعلموا و"غُشم".