الكلام ليكِ يا جارة

د. مينا ملاك عازر | 2012-08-21 00:00:00

بقلم- مينا ملاك عازر

شوف عزيزي القارئ، أنا اليوم ليست لدي الرغبة مطلقًا وبتاتًا أن أتحدث عن مصر، ولا عن رئيسها، ولا عن جماعة الإخوان المسلمين، ولا عن حزب الحرية والعدالة، ولا أي حاجة تخص الشأن الداخلي، أنا قررت الخروج للعالمية، مش أصحاب الجوائز بيقولوا إن الغوص في المحلية في كتابة الروايات مثلًا يوصل للعالمية، أنا العكس، حاغوص في العالمية عشان أبعد عن المحلية.

الرئيس الفرنسي، عقبال أمالتكم، أتم مئة يوم حكم، كل مئة يوم وهو طيب، الرئيس الفرنسي اشتراكي يحكم "فرنسا" من مئة يوم، ولما تم المئة يوم بعد أن هزم الرئيس السابق الفرنسي "ساركوزيه"، وبعد عدم هرب الأخير للإمارات لأنه لا يخشى من انتقام المنتصر منه وتلبيسه كم قضية كده، أقول بعد ما حكم "أولاند" مئة يوم، عمل ستة إنجازات، كل إنجاز أسوأ من إللي قبله، أنا مش عارف ليه الفرنسيين مش بيعرفوا يختاروا؟ لكن على أي حال، حافرج حضرتك على الإنجازات الستة وأحكم على الفرنسيين وإللي بيعملوه في نفسهم، وإزاي بيعتبروا الكوارث دي إنجازات.

1- ضبط الميزانية، خلي بالكم من هذا الإنجاز المشين للفرنسيين، لم يستلف من قطر اثنين مليار دولار، ولكنه اتخذ إجراءات كان من شأنها- بعيد عنكم والشر بره وبعيد- ضبط الميزانية.

2- رفع الحد الأدنى للأجور، والمصيبة دي لما عملها لم يعملها بناءًا على حكم محكمة تلزمه بهذا، لكنه عملها من باب إن البعيد مش حسيس، ولا عنده دم، ومكبر دماغه من شعبه، وشاغل باله بشعوب تانية.

3- تعديل قانون المعاش ورفع قيمته، آه دي بقى مصيبة الرئيس الفرنسي، لأنه أول ما تولى كان تقريبًا موافق للموعد السنوي لرفع المعاشات، فكان مقرر يخليها عشرة المئة، فالناس هاجوا وماجوا وقالوا يا راجل ده إللي قبلك ما عملهاش، وبعدين خلي الفرنسيين يفرحوا بوصولك للحكم، مش كفاية خايفين منك ومن جماعتك، فقرر أنه يخليها خمسة عشر بالمئة وهو متضرر، رئيس بيحس بشعبه بقى!.

4- ضبط الإيجارات وتعديل قوانينها، سيبكم من الكارثة دي، لإن مافيش زيها في أي بلد في العالم، الراجل ده بتاع كوارث ومصائب، مش عارف ناوي يودي "فرنسا" على فين؟.

5- تحقيق الأمن، ووضع قانون جديد ضد التحرش الجنسي، وخلق– والعياذ بالله من كلمة خلق كفرة بقى- 15 منطقة ذات أولوية أمنية، والبلوة دي إتعملت لأن "فرنسا" كانت بتعاني من انفلات أمني، وخاصةً بعد مقتل الجنود الفرنسيين إللي اتقتلوا على حدود "ألمانيا" على أيدي الجماعات الإرهابية الألمانية، وحكاية الخلق دي لإن عنده مناطق أثرية وسياحية يأتي إليها الكفرة يتعبدوا فيها للأصنام هناك، فعمل كده عشان يقتص بؤر الكفر من بلاده، راجل ربنا يبارك له، ولا ينتقم منه هو ونيته، وأصل كان خايف على مقرات جماعاته المكروهة من المجتمع، وخايف لا المقرات تتحرق وتضيع عليهم حق المقرات إللي خادوها من الخليج الفرنسي.

6- ونحن هنا في مجال الثقافة- أعوذ بالله- الراجل الكافر عمل إيه، خفض الضرائب على الكتب وعروض المسرح والأوبرا إلى 5.5 % فقط، واحد عايز شعبه يتخلف بقى حانعمل فيه إيه؟ فبيخليه يقرأ ويشاهد مسرح وأوبرا- أعوذ بالله من الخبث والخبائث- يا جماعة الحاجات دي حرام، تلهي الإنسان عن ذكر الله!.

عرفتم بقى ليه "فرنسا" متخلفة؟ وتتراجع بيهم وبلاد تانية بتتقدم بشعبها، هما بيعتبروا إللي قلناه إنجازات، لكن أنا وريتكم خطورة إللي عمله، وإزاي إنها كوارث.

عزيزي القارئ، حقًا قام الرئيس الفرنسي بهذه الإنجازات الستة، والغريب أنه لم يحاول تحويل "فرنسا" واقتصادها للاشتراكية، مع أنه اشتراكي، ولم يكتب في دستورها مثلًا نصًا بأن "فرنسا بلد اشتراكي".

المختصر المفيد، أرجوكم، إللي على رأسه بطحة ما يحسسش عليها، إحنا في عيد، ومش عايزين نكد، وألم، إنتم مالكم ومال إللي قتله، ده إنتم كفاية عليكم تشتموني.

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع