"فيه ايه يا مصر؟!"

| 2012-06-11 00:00:00

حقاً, حزنت كثيراً من مصر و من المصريين في الوقت الماضي و الان مما نمر به في بلادنا في هذه الايام.
فيه ايه يامصر؟ فيه ايه يا مصريين؟
ايه اللي خلاكم متفرقين, ايه اللي خلاكم متعصبين
بتدوروا على راحة البال و ع الاستقرار و ع التغيير و الحرية و العدالة و المساواة و الكرامة
و فاكرين ان كل الامور دي و حقوقنا هانجيبها بايدينا و بتشددنا لرأينا , وعجبي

كل الامور و المطالب اللي احنا عايزينها دي مش مستحيلة , لا بالعكس, دي مشروعة لأي بني ادم ع الارض لأنها اولية و مطلوبة
لكن اللي احزنني و يوجعني يوماً بعد يوم, كُرهنا لبعض و تفرقتنا و عداوتنا لبعض و تخويننا لبعض و تجريحنا و اهانتنا لبعض, و عجبي
ناس عايزة تغيّر بلدها و بتشوه في صورة بعض, ناس عايزة تشوف التغيير و مش متحدة على حاجة واحدة
ناس عايزة تغيّر اوضاعها و ظروفها ,و قلوبها و حياتها مافيهاش تغيير !
يا مصر,

علاجك في جراحة
جراحة قلب مفتوح مش مستعصية عند الله
القلب الفاسد و الفكر الفاسد علاجه التطهير و التنقية و التغيير من خالق و صانع القلوب الوحيد و هو الله
لما تتغيّر القلوب, هاتتغيّر الافكار و تتغيّر نظرتنا للواقع و الظروف
لما نعرف ربنا صح مش بس نعرف عنه معلومات, ها نعرف يعني ايه تغيير و يعني ايه حرية و يعني ايه مساواة و يعني ايه كرامة و يعني ايه انسانية .
لما نتغيّر و نطلب التغيير من الله الحي القدير هانعيش عيشة مختلفة و يكون عندنا امانة و ضميرنا يبقى صاحي و نقي و يكون عندنا تقوى و مخافة لربنا
ها نعرف بكدة نمحي الجهل المتفشي فينا و الاستغلال و الفساد و الكراهية و التطرّف و التديّن الظاهري و الضلال و الحياة اللي مالهاش قيمة و معنى اللي ممكن نكون عايشينها الان

يا مصر, علاجك في الله, علاجك في التغيير الالهي , علاجك في معرفة الله الحي الحقيقي المُحب القادر على كل شيء المُخلّص للانسان من كل شروره و فساده
التغيير ليس لرأس نظام بل للنظام كله و نحن من النظام و لن نتغيّر من انفسنا لأننا لا نقدر بدون الله على اي تغيير.
الله يغيّرنا اجمعين.
فلنتب جميعاً يا مصريين .
الله معكم

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع