الأمريكان يمتنعون

بقلم: مينا ملاك عازر

  امشي امشي يا ديك الفرخة دي مش ليك، ارحل يعني امشي، طب لما حضرتك من دول، ووالدة حضرتك لديها وثيقة سفر أمريكية بتحرج نفسك ليه؟ مش حاقول لك بتكلف نفسك ليه؟ لإني عارف إن تمويل حضرتك كله من بره من شيوخ الخليج إللي فلوسهم كتيرة، مش مشكلة، المشكلة بس لو طالبوك بالفلوس دي يا معلم، لا طبعاً مش بأكلم حضرت يا سيادة القارئ، أنا بأكلم حضرته ح ص أ إ أيوه بأكلم مِستَر حازم المرشح المحتمل خروجه، والذي أكدت الداخلية على خروجه من سباق الترشح لرئاسة البلاد والعباد، أصل الداخلية تؤكد أن والدته استخرجت وثيقة سفر أمريكية قبل وفاتها بأربع أشهر.

DEAR حازم، كلفت الناس إللي وراك فلوس أد كده عشان حضرتك ليك رؤيا بإن من يحمل وثيقة سفر لبلد ما لا يعني هذا أنه يحمل جنسيتها، بالذمة ده كلام يا راجل يا طيب، وبتقول إن والدتك ما قدمتش طلب للحكومة المصرية للموافقة على حيازة الجنسية الأمريكة، وبتشكك في قانونية الجنسية الأمريكية في هذه الحالة، ونسيت إن طلب مصرية من مصرأن تحمل الجنسية الأمريكية مثلاً لرغبتها في أن تحتفظ بالجنسية المصرية والأمريكية، في حين أنها لو لم تفعل كوالدتك فهي بذلك تسقط عن نفسها الجنسية المصرية كمان خلي بالك يعني هي مش مزدوجة يا راجل يا طيب دي وحيدة الجنسية وهي الجنسية الأمريكية.

لا ألف مبروك بجد ألف ألف مبروك، ولو إنك كده إتورطت في دفع إللي عليك من مصاريف بوسترات وأوتوبيسات ودعاية وتكلفةحملة لإن أكيد الشيوخ إللي إدوها لك لن يتركوك في حالك أو سيكلفوك بشغل بيهم ،يعني حاتشتغل شكك يا زعيم. 

وأنا إللي كنت مش فاهم ليه حضرتك كل ما تتكلم تجيب سيرة أمريكا وأوباما وإنه بينتظر ترشيحك ويترقبه، وحاطط أمريكا في دماغك وزاعق، أتاريك عارف إنهم حايبقوا مبسوطين بإن ابن أمريكية يحكم مصر، وأخو أمريكية يحكم مصر وده شيء يشرفهم يا راجل ياأمير، بجد فرحان لك بس أنا لو منك أعتذر وأقول ما كانشي قصدي، يعني إنتم يا سلفيون لازم تستنوا لماغيركم يفضحكم، واحد كدب لغاية ما جه الدكتور وقال إنه عمل عملية تجميل، وحضرتك تستنى لغاية ما الداخلية تحرجك كده، ما كان من الأول، ولا تلاقيك كنت واخد وعود وتطمينات بأن ذلك لن يعلن من حد، قول قول يا فتى، ولا تلاقيك كنت فاكر إن الوثائق إتحرقت مع إللي إتحرق في الثورة، أو كنت فاكر إنك ممكن تجيب المستندات لكن يا خسارة فلتت منك وتعيشوا يا سلفيون وتكذبوا غيرها.

المختصر المفيد عقبال الباقي ما يرحل، والكل كذبه يبان، يا ما إنت كريم يا رب. سؤال عل الهامش قبل ما أمشي إيه إللي خلا والدتك وأخواتك يروحوا بلاد الكفر والرزيلة، وياخدوا جنسيتها يا مؤمن!؟

 

جميع الحقوق محفوظة للأقباط متحدون © 2004 - 2011 www.copts-united.com