طلب إحاطة

 

أحيط الشعب علمًا بأنه مسروق.. والسرقة حتمًا من داخل الحدود.. ولا بالشحتفة ولا بلطم الخدود الوطن سيعود.. ولا بفرو أرنب تغلب فرو الأسود.. ولا جبروت ممكن يتاكل.. ولا الليل يكون له سلاسل.. يكون له شناكل.. يبقى الذل ليه نبلعه؟.. مُخ وربك عطاك يبقى ليه يا ساكت تخلعه؟.. ليه العُمر يضيع ف آهات؟.. ليه تعيش في صومعة؟.. لزمًا نفتح.. لزمًا نشوف.. لزمًا نبرق ف وش الخوف.. لزمًا نصرخ.. لزمًا نقول.. الدنيا نهار مش ليل على طول.. الدنيا شروق مش بس غروب.. مش بس قمر ف سحاب محجوب.. الدنيا أمل.. والحلم عمل.. الدنيا حُب وود وغُنى.. مش بس نجوم بعيده عننا.. الدنيا أنا.. الدنيا أنت.. وإزاي تكون لو إحنا هونّا؟؟؟