أصحى يا مصري

| 2012-01-29 00:00:00

بقلم: جون عدلي

اصحي يا مصري فاضل يوم
قوم من كسلك صحي النوم
ثورة بجد ما فيها رجوع
أزاي قادر تغفل لحظة؟
وكل كلامك بقا ممنوع؟
صرخة أب شهيد موجوع
وأم شهيد بتموت م الجوع
نازل أموت ومحدش يبكي
ما بقاش وقت خلاص لدموع
ياما بكينا الشهدا نواح
فوقنا لقينا حقها راح
ماتوا عشانا والا نسيتوا؟
والا بقيتوا سداح في مداح؟
دا النفس الخارج محسوب
والغالب أصبح مغلوب
شيلتوا الريس كده وفرحتوا؟
ما المكتوب لساه مكتوب!
مكتوب نفضل بردو عبيد
ظلم وقهر يزيد ويزيد
والحجه استقرار !!..إنتاج!! ...
وافرحو يلا بعهد جديد
مش هسكت هصرخ وأتكلم
مابقتش في سجنك بتألم
هفضل حر وحتى في سجنك
سجانك مني هيتعلم
يتعلم يصبح إنسان
يتلم يبقاله كيان
يتعلم أزاي بيضحي
بالروح علشان الأوطان
أنا نازل مش راجع تاني
وميداني بيتي وعنواني
ياهتخضع وبثورتي ترضى
ياتموتني وبردو مكاني
هثبت مش هتزحزح ثانيه
لو خرمني رصاص الدنيا
وهموت وأنا واقف مش واقع
علشان كتفي في أكتاف تانيه
ويا بلدي يا طالبه التغير
أنا نازل اموتلك بضمير
مش عايز دمي يضيع فيكي
زى ما ضاع والشهدا كتير
و صوتهم أصبح مش مسموع
اصحي يا مصري فاضل يوم
قوم من كسلك صحي النوم