انتخبوني

| 2011-11-07 00:00:00

انتخبوني وأنا عن نفسي هبقى شجاع
واللي هقوله هيبقى حقيقي مش بخداع

بس أنا لسه ما اخترتش رمزي الانتخابي
تفتكروا أختار قلمي ولا اختاره يبقى كتابي

بتهيئلي أحسن حاجة أبقى صادق من جوايا
يمكن صدقي يخلي الناس دي تبقي معايا

مش عايز أقول شعارات وأنا هعمل وأعمل وأسوي
ولما أنجح أنسى الوعودات والغلبان يفضل مستني

أنا ياجماعة ها ارشح نفسي مستقل مش فئات
يعني لا هبقى ويا جماعة تقول للحق خلاص أهو مات

أنا عايز أرسم لبلادي صورة جميلة تشوفها العين
مش هرسم جوه الصورة أي جبان أو حتي لعين

وعايز أقولكوا وعد صريح مش هكتب شعارات ثورية
ولا هتمسح زي الناس التانية وأردد شعارات دينية

بس المطلوب منه ومنك يبقى صوتكم كله أمانة
اختار اللي يحس بهمك وانسى الناس اللي كرهانه

مش طمعان أجمع في فلوس أنا عايز حوليا نفوس
تهتف تحيا بلادنا الحرة واللي يخونا يبقي جاسوس

أنا عايزك يا بلادي جميله فيكي أحمد واخوه مينا
دول أهاليهم رفعوا الراية لسه الدم في تراب سينا

كده يا جماعة خلصت كلامي واللي مؤيد يستناني
واللي يعارض فكري وأملي حقه إنه خلاص ينساني