إطلالة في أحوال المحروسة

| 2011-10-02 00:00:00

بقلم: ميلاد منير

المفكر الإسلامي "سليم العوا" قال يوم الجمعة 30/9 على المنصة، إنه هنا لمواصلة عمله الشعبي والثوري، وهايكمل حملته الانتخابية للرئاسة بعد ما تتصلح الأحوال... أيوه ياعم، ما أنت لما جيت تنزل من ع المنصة شالوك الشباب من ع الأرض لحسن رجليك الطاهرة مينفعش تمشي على أرض "التحرير"، ياختي عليها ياختي عليها..!!

جماعة الإخوان المسلمين قالت في بيان شديد اللهجة!! تعليقًا على الإعلان الدستوري السري، إن المجلس بيمشي على خطوات "مبارك" القديمة، وإنه لازم يسلم السلطة لأهلها (الإخوان المسلمين طبعًا هما أهلها)، وحياة أبوكم كفاية افتعال وكدب، احنا هانمثِّل على بعض؟ يا حلو وريني خطوتك، ده المجلس العسكري ظبطك..

"إسرائيل" تكثف قواتها على الحدود المصرية، وإخواتنا بيكثفوا قواتهم في "التحرير" لتحرير "سوريا" من "بشار"، وإنشالله الطلعة الجاية هانروح نحرَّر "فلسطين"، ويموت الشعب المصري وطظ فيه.

بالم هليز تعيد (190) فدانًا من أراضي الاستصلاح الزراعي للحكومة.. يا مسهل، كله ده كان فيه يا ولاد الـ ، ويا حلو بانت لبتك.

"مصر" تتراجع إلى المركز الـ 94 في مؤشر التنافسية العالمي. يا خويا بتوع المؤشِّر دول لو شافوا أحوالنا بعيون مصرية هايدونا المركز الـ 142 بامتياز.

علَّق صديقي الإسلامي على خسائر البورصة المتكررة بأنها "يارب تخرب.. أحسن"، والفرحة مالية عنيه.. وماله ياعم، فداك اقتصاد "مصر" كله، وفداك البورصة والبورص جوزها، وطظ في "مصر" لو هاتلعب قمار!!

الناس بتوع هيئة النقل العام.. "أنا اشتقت على الأتوبيس الأخصر أبو نص جنيه"، والنبي انتو راجعين امتى؟؟

لما الهيئة القومية للبريد كلَّفت خاطرها وجات توظف دفعات كلية التجارة بريد، المركونة بره مش لاقيه شغل، هاتوظفهم موزعين بريد يلفوا في الشارع!! الأشرف إنهم يشتغلوا مندوبين مبيعات، بدل ما يبقى مدير المكتب حاصل على دبلوم والموزِّع معاه بكالوريوس وجايب في الثانوية العامة 92%!!.. كل اللي أقدر أقوله "دائرة كبيرة وفيها نقطة وكلمة ...."..

مش فاهم سر اهتمام الناس ببدلة المشير! ما يلبس حتى بوكسر وينزل الشارع، مش هو ده إللي هتفناله "الجيش والشعب إيد واحدة"؟! مفيش مانع نهتف "البدلة والبوكسر إيد واحدة"!

الشركة الشرقية للدخان عاملة مجلة اسمها "كليوباترا"، وأصدرت العدد (44) منه، والمجلة دينية تثقفية وترفيهية، وكتر خيرهم عاملين توعية للناس من السجاير المضروبة والمهربة؛ حرصًا على صحة المواطنين وسلامتهم!! في صحتكم انتو..

أخيرًا، هاتلي قلب لا داب ولا حب ولا كلش فول من ع العربية ينفع يبقى رئيس جمهورية..