طباعة الصفحةخلاص يا امَّا أنا راحل
|
2011-09-07 00:00:00
بقلم :اميل سمير معوض
أنا مسافر وتارك كل ما ليا
بحبك يا امّا وترابك.. وأحبابك.. أعز شئ على عنيا
راحل
راحل يا أمَّا وأنا تعبان
ماشي وقلبي هنا مكسور
بنفضة قلب كان عيان
بقوة حطَّم مليون سور
راحل
راحل يا أمَّا وأنا خايف
من بكره وبعده وإيه هيكون
ماشي معمي ومش شايف
وإيه فيكي يا أمَّا كان مضمون
راحل
راحل يا أمَّا من التخوين
تعبت من القسوة عليا
انتي في كل فؤاد وجبين
وأنا ولا حد داري بيا
راحل
راحل يا أمَّا بدموعي
ما أنا فيكي تعبت كتير
مش ضامن حتى رجوعي
بس أنا ضامن التغيير
راحل
راحل وبحبك موت
وحبك عايش في وجداني
ده العمر يا أمَّا بيفوت
هيفوت ومش راجع تاني
راحل
راحل يا أمَّا وإدعيلي
طول عمرك قلبك كبير
إدعي الدنيا تديلي
إدعيلي يا أمَّا كتير
جميع الحقوق محفوظة للأقباط متحدون © 2004 - 2011 www.copts-united.com