"لا شيخ ولا قسيس" فيديو كليب عن أسباب وحلول الفتن الطائيفة في مصر

مايكل فارس | 2011-07-21 16:15:15

كتب: مايكل فارس

قام "مانو عزت" -طالب بكلية الآداب بجامعة عين شمس- بعمل كليب لشرح أسباب الفتن الطائفية، وكيفية حلها، وتوجيه رسالة للدولة والشعب معًا لحل الأزمة من خلال قصيدة "لا شيخ ولا قسيس"، تعبيرًا عن الاحتقان الطائفي في مصر.
وقال "مانو" لـ"الأقباط متحدون" أنه قام بتصوير كليب للقصيدة، وذلك لتوجيه رسالتين أولهما للدولة بأن الأقباط حفظوا جيدًا الحلول التي يقدموها للأقباط في أعمال العنف الطائفي، وأنهم أدركوا أنها لم ولن تجدي.
وأضاف أنه قام طرح رؤيا لحلول واقعية لتلك المشكلات، بينما الرسالة الثانية للشعب كي لا ينقاد وراء رجال الدين بلا تفكير.

وتقول كلمات القصيدة:
لا الشيخ ولا القسيس ربنا.. دول بشر زيهم زينا.. فيهم ناس متمونة.. وفيهم ناس متلونة.
و فيهم اللي بيعمل أبو الشجعان.. وساعة الجد بيجيب ورا.. يتاجر بالدين ويعمل سهتان.. وهو غاوي شهرة ومنظرة.
بلاش تتاجر تاني يا غلبان.. دا أنت مسيرك تشرف مقبرة

1
مابنقولش حالة فردية و بنقلبها جريمة دينية
مابنقولش حالة فردية وبنقلبها جريمة دينية.. وبننسى جملة ضحكتنا هو الدين بيقول إيه.

و بعد يوم تأتي مذيعة على إحدى القنوات الفضائية.. وتقول خبرًا هامًا و سريعًا مضمونه الوحدة الوطنية.
و تحكي كيف ضحي أحمد لإنقاذ أخته ماريا.. وكيف يحب الأخ مينا أصحابه فاطمة وعليا.

كفايانا نحل بحل بينج.. ونجيب شيخ في إيديه قسيس ونعمل حلقة عن التبويس
أصل شعورنا بيبقي مهنج.. وطول ما فيه نفوس معبيه هتبقي ليليتنا مش معديه.

2
طب و إيه الحل؟؟.. دا أنا قربت أتشل

صحيح الأكترية معتدلين.. بس برضه فيه متعصبين متشددين.. ودول ناس لا عندها عقل ولا فاهمة دين.
و زي ما فيه مصريين ملايكة.. فبرضه فيه مصريين شياطين.. والناس اللي تنكر ده تبقي فعلًا مجانين.

فما يبقاش الفاعل قدامنا ونقول مجهول.. أو نعمل نفسنا عبطه ونقول مخبول
وباسم الحب نبدأ لعب ثبت صنم.. ويبقى الكل لسانه مشلول.

يا عالم سكوتنا هيخلي الفاعل يبقي مفعول.
يا عالم سكوتنا هيخلي الفاعل يبقي مفعول.. وفي غمضة عين هنلاقي الدم أصبح سيول.. وساعتها لا هينفع بنج ولا حتى محلول.

3
شكلك مش فاهم يا نصة.. طب اسمحلي أفهمك القصة

واجب ديني عليا أنشره.. وأخويا في ديني لازم أنصره.. واللي عنده اعتراض ع الكلام ده.. يبقى كافر ولازم أنطره.
يعني تكره وتسب وتقتل.. وتقولي أنا بأخدم ديني.. دين إيه يا أبو دين أنت.. دا أنت طلعت عيني

اسمحلي أقولك إنك قفل.. وعقلك يشبه عقل الطفل.. ونصيحة إشربلك لبن كتير.. عشان قلبك متعاص بالتفل

4
طب و كلام رجال الدين.. يا اللي نهارك أسود من الطين

لا الشيخ ولا القسيس ربنا.. دول بشر زيهم زينا.. فيهم ناس متمونة.. وفيهم ناس متلونة

وفيهم اللي بيعمل أبو الشجعان.. وساعة الجد بيجيب ورا.. يتاجر بالدين ويعمل سهتان.. وهو غاوي شهرة ومنظرة

بلاش تتجر تاني يا غلبان.. دا أنت مسيرك تشرف مقبرة
فهمت بقي يا أبو نص لسان.. ولا أنت لسه مش إنسان

لمشاهدة الفيديو كليب انقر هنـــــا