ماسوني كافر!

بقلم: ميلاد منير
لما العمدة ساب البلد

وسلمها للغفر.. ورحل

اللي كسر وراه 100 قلة

واللي بكى واللي انتحر

فين أيامك يا عمدة؟!

محدش غيرك. يحكم غجر!!

طلع الواد المتعلم

واتكلم قالوا ده كفر...

لف الكلام ودار

وكبير الغفر احتار

إزاي نلهي البشر

طيب نولَّع البلد نار

الواد المتعلم

مرضيش يبقى حمار

دمه في عروقه ثار

صرخ بصوته وقال

عايزين البلد تبقى عمار

هو أنا ليه طردت

العمدة بره البلد؟..

علشان أسيبها للغفر؟

ولا لشوية دراويش؟؟

ما عندهمش نظر؟

واحد من الغفر وشوية أنفار

نشروا الخبر في البلد

الماسوني هايسلِّم البلد

للكفار!

ولعت البلد.. والمدندش بعد

ما ملاهم حكايات عن

إخواتهم الكافرين

العلمانيين.. الماسونيين

حلفوا برأس أبوهم

ميبقوش رجالة

لو ما طردوش من البلد

الكفار!!!

آه يا راسي.. آه يا بلد

حاكمها الغفر..

والعمدة أساسه كان غفير

واللي ناحوا عليه.. شوية حمير

واللي مش عاجبه حال البلد

ماسوني كافر

وابن سورى في التعبير.

 

جميع الحقوق محفوظة للأقباط متحدون © 2004 - 2011 www.copts-united.com