الفضل كلّو

زهير دعيم | 2011-05-21 00:00:00

بقلم : زهير دعيم

موّال:
البحر والموج والنسمة ودموعي
الكلّ بيحكي عن ندمي ورجوعي
الفضل كلّو بردّو لَيسوعي
اللّي اشتراني بدم أغلى من الذَّهَب

دمَّك غيّرني وجَدّد فِيِّ الأفكار
ولوَّن حياتي بنغمة وضُمّة أشعار
نقلني نقلة كْبيرة من هاك الدّار
وزْرعني في بستانو بين الأبرار

مِنْ غيرَك كنت ضايع رايح للنار
ماشي ومش داري بْحالي معمي الأبصار
فتّحت عيوني يا غالي باكليل الغار
وكْتبت اسمي وعيالي بين الأحرار

انت أملي ورجائي ونغم الأوتار
انت نسمة أيامي باحلى مِشوار
خذني عَ كْتافَك حافي فوق الأنهار
وطوّفني في ملكوتك بين الأطهار

السَّما بتسجُد لجلالك وكلّ الأقمار
وبتستنا يوم تكحّل فينا الأنظار
يمكن تيجي هالليلة ، يمكن بأيّار
وتخطفنا عّ بلادك ويبقو الاشرار

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع