آه ياوطنى

محبة مترى | 2011-05-13 00:00:00

بقلم محبة مترى

فتحت شباكى طاقة للهوا والنور
لاجل يدخل نسيمك زهر وعبير منثور
عطر غالى جوه حضنك فى الفؤاد مبدور
فى الصبح أفرح بيكى وف ليلى أبات مسرور
بصيت لقيت مش هو شارعنا
ده طريق مسدود ولا فيهش اى مرور
ليه البيوت مايلة ، بينها جبال عالية ؟
وسحابة سودة ضللت فوقنا
منعت شعاع الشمس فى سماكى يدور.

---------------------------

شارعنا ياللى كنت زينة الحى
ياما سهرنا فيك نحلم ببكره الجاى
ليالى غنينا للعيون السود
وقلنا أشعارنا بربابة وعود
وليالى لميتنا فى سبوع مولود
أول مايحبى يجرى اول خطوة عليك
يقول أنا موجود هابنى وأعمّر فيك
وليالى عشناها سوا أفراح وأحزان
نمسح دموع بعضنا ونطيب الوجدان
ولما نفرح صوت ضحكنا يعلى
تفرح معانا وتشهد لنا الأركان .

----------------------

حريتى ياللى انتظرتك سنين وسنين
ليه لما شوفتينى لقيتى وشى حزين
مش قادر أفرح بيكى ولا اقوم أهنيكى
حاسس بعجزى وقلبى كله أنين .

-------------------------
ياوطنى مين جرّحك مين خلاك تقول الآه ؟
غمض عيونه عن جمالك ولا شافش الا سواه
يهدم يدمر فيك وهو فاكر انه بيرضى الله
سبحانه عادل وشايف كل شئ فى علاه .
يا وطنى مين ألّمك وازاى نسى الأمجاد ؟
معرفش مين حكّمه قاضى ومين عيّنه جلاد !!!
-------------------------------

يامصر يا حبيبتى يا أمى وأهلى ومدينتى
أكدب لو أحبك بالكلام واللا الشعار
أكدب لو ما احط ايدى فى ايد اخويا
وأطّفى أى مستصغر شرار
نبقى واحد ضد كل شر وأى نار
مش فرقتين فى اليمين وفى اليسار
وبلاش نخون دم الشهيد
اللى ثار ومنحنا أجمل انتصار
بالحب وحده ممكن نتخذ القرار
وتدومى لينا يا مصرأمن وسِلم وعمار .

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع