مرثية في إبن لادن

إيهاب شاكر | 2011-05-08 00:00:00

بقلم: إيهاب شاكر
عجبي على اللي بيعملوا من قاتل ومجرم بطل
عجبي على إرهابي وسفاح خلى العالم كله في خطر
زعلوا عليه اللي زيه ومازعلوش على أبرياء سقطوا زي المطر
يعملوا له جنازة وهو قاتل تحت السمع والبصر
سفاح سافك دماء بدم بارد للبشر
هدفه في الحياة الموت موت العباد اللي اختلفوا معاه في الخبر
وايه الفرق يندفن في تراب ولا ماية بحر
الإنسان عنده مش إنسان كان بيدبحه كما البقر
اعتبر نفسه وكيل لله في أخذ الحياة
وسبب للعالم هم وضجر
قولولي لما يقف قدام الاله هيقوله قدم ايه للحياة غير الدم والالم والسأم
والمكافأة يا ترى هتكون إيه غير من جنس العمل
بشروا كل اللي ماشي على دربه ومكمل في حربه
بشروا كل سربه النهاية قربت نهايتكم هنا أو هناك
لأن الأمر بقى أكتر مما يُحتمل

عقولكم اتملت كره وحقد للأخر
ايديكم مغسولة بالدم الناحر
الانتقام في دمكم وده صفة إبليس مش الله الغافر
قايين قتل أخوه ونص العالم من غيرة وحقد
وبرضه صوره علشان دين ومعتقد
حب يقرب لربنا بدراعه ودم أخوه
بقى أكتر واحد على الأرض مكروه ومنتقد
يا بن لادن ماتفرقش كتير عنه
اتغويت وغويت واتباعك بصوت النحيب غنوا
وزي مااتلعن قايين كل اللي زيك اتلعنوا
ياريت نفهم إن الله عمره ما يطلب إننا ندافع عنه
يبقى ضعيف وحاشا ليه
ده اللي بكلمة يخلى الذئاب والكلاب في الجحور يكنوا

عجبي على واحد بدل ما يشيل فاس شال بندقية
بدل ما يزرع في الأرض خير ملاها دم وقسية
بدل ما يتبنى السلام بقت الأرض كلها حرب ودي القضية
عجبي بدل ما يبني شغلته يهد ويخرب
سخر كل فكره للخراب والدمار
جاب لدينه القيل والقال والعار
سيطه بلغ كل الأرض وأعالي البحار
بس بالخزي والدبح والكبريت والنار
بقى دي شهرة يرضاها إنسان
أهو بقى عبرة في كل مكان
ومن قتل بالسيف بالسيف يُقتل ولو بعد آن

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع