أحلم من تاني

نشأت عدلي | 2011-03-27 18:00:42

بقلم: نشأت عدلي
طول عمري وأنا مغرم بحبك..
هايم بيكي وغرقان في عشقك
دايمًا فخور بإني ابنك
مانا مولود على أرضك
شميت ريحة هواكي
وشربت من نيلك
وادَّفيت بشمسك
بحبك بس كنت بخاف منك
بخاف من كتر ظلمك
وبخاف من جبروت قهرك
وخفت من بكرة اللى تاه من أحلامي
وتاهت معاه كل أيامي
وبعد ثورة شبابك وشعبك
ووقفتهم اللي عبَّرت عن حبك
وأصّرت على فك القيود منك
بدم أصيل ونقي سال فدا أرضك
افتكرت إن الحلم جايب معاه أحلامي
والخوف اللي ماليني مش راجع تاني
لكن حسيت بحاجة جواكي تعباني
حسيت إن الأمان مش قادر يرجع تاني
ولا سلامنا ووحدتنا يبقوا ضمان للأماني
حسيت إنك رايحة يا بلد في سكة التواني
وترجعينا لعهد كنا فاكرين إنه مش جاي تاني
بقيت خايف أكتر من الأول على ولادي
خايف من بلد أفتكرْت إنها حتقدِّم الأماني
قلنا خلاص نكتب عن مستقبل البلد
وعن حلمنا اللى نحققه فيه وبيها
لقيت الحلم في قاعة مستني يقبل منا التعازي
لقيت المستقبل مغطي وشه خجلان
وبيصرخ في وشي ماعدش ليك هنا أمان
ثورتوا وموتوا وهتفتوا، ورجعتوا أنيل من زمان
روحوا دوَّروا على بطل مصري أصيل
يحميني ويجيب لي وياكم الضمان
ويجيب الحق اللي ضاع من زمان
يصون كرامة المصري كرامة الإنسان
أاااااااااااااه يا بلد
كان نفسي أعيش الحلم جواكي ومعاكي
لقيتك إنتي نفسك تايهة عن حلمك
وتاه مستقبل الإنسان جواكي
بس افتكري لسة ملايين مستنية نداكي
وعمر المصري ماسكت على ظلم جواكي
ولازم نرجّع حلمنا من تاني
ونشيل الفقاعات من كل الأواني
وترجع ضحكة ابن البلد المعجباني
وتملاكي الفرحة يا بلدي ونعمَّر القلوب تاني
تعود الفرحة ومعاها نصر مليان أغاني
لازم تعودي يا بلد.. لازم تعودي

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع