طائر الحرية

رمزى لوقا | 2011-01-19 10:45:56

بقلم: رمزي حلمي لوقا
بأفرد جناحي في الفضا وأشدو برضا لما الندى يلمع على ورق الشجر يغسل قلوب زى الحجر، يمنح جماله للورود ينضح براءة على الخدود لما كلام الحر يكمل بالخلود، وقت الصمود ما تهزهوش لحظة خطر يوم ما البشر كل البشر تاخد نصيبها في الوجود.

*** تونس يا خضرا شقي بصوتك المدى هبوا شبابك لما رددتي الندا، كانوا الفدا وكانوا لنشيدك لما غنيتى الصدى بكرة ابتدا بنور شهيدك، لما بالروح افتدى حريته وسكته بعناده وسط الظلم والشوك والردى يوم ما ارتدى صبره وعزيمته و بتاريخك اهتدى

***فينك يا سمرا..؟ وفين شبابك..؟ اللي مخلوق من ترابك اللي مكوي بنار عذابك، واللي ضيع حلم عمره بين سرابك يكفى دورك خلف بابك..!؟

***فين ريادتك ..؟ فين قيادتك ..؟ كنتى تمشى وكانوا يمشوا في ركابك لحظة ميلادك، يا وطن لحظة زمن نعلن ميلادك في العلن بعد المخاض المر والخوف والمحن بعد الفساد والظلم والسوس والعفن، و لا بد من دفع الثمن لا بد من دم الشهيد ولابد من النار والحديد تولع تقيد تكبر تزيد تصبح رماد لأجل الولاد ما يقلعوا توب العبيد، ويعيشوا حرية وطن من غير جراح من غير شجن و لا بد من دفع الثمن لا بد من دفع الثمن

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع