إسكندرية ليه...؟

رمزى لوقا | 2011-01-09 00:00:00

بقلم: رمزي لوقا
أصرخ    ..؟
أبكى      ..؟
لأ ... مش ها أصرخ
ولا يوم ها أبكى
ولا ها استسلم بين أحزانى
ولا يوم ها اضعف
ولا ها تردد
ولا ها اترنح لحظة مكانى
أصل رجايا بيغلب خوفى
جوّة الروح
مش زيف برانى
وسط الضيق ما بكونش لوحدى
روح الله فى الضيق يرعانى
وسلامُه على طول   جوّايا
يحمى هدوء روحى و إيمانى
هو البلسم يشفى جراحى
وهو الفرح فى ليل أشجانى

***

الاستشهاد نور قناديله
ضيه بيجذبنا لأكاليله
وتاريخنا مسطور بعطوره
و قلوبنا إن غاب تنادى له
لا   بنهجر ابداً أوطانـّا
ولا ننسى لوطنـّا ِجميله
وبلدنا راح تفخر بينا
دى دمانا فى حروبها قليلـُه
بنمد إيدينا لاخواتنا
لو مظلوم .. لأخويا أشكى له
نبنى فى وحدتنا الوطنية
دا المصرى   فى الحب سبيله
لا ها نترك حاجة تفرقنا
والتمييز نفضح   افاعيله
لا تعصب دينى وتطرف
ولا فكر بينشر أضاليله
ما ها نكسر أبداً وحدتنا
والإرهاب ما ها   يشفى غليله
ولا ها نخاف
ولا نهرب ابداً
ولا يرهبنا فى يوم    تهويله

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع