مبروك انت مضطهد

رغدة السعيد | 2016-07-29 20:42:27

هو فى كده؟

هو ممكن أي حد يكون حاسس بـالاضطهاد ويكون سعيد؟

طب ليه لأ؟

الاضطهاد = استخدام السلطة لتدعيم مجموعة على حساب تضعيف مجموعة أخرى.

مش يمكن يكون الاضطهاد ده بسبب نجاحك أو بسبب جمالك، أو حتى من غير سبب خالص؟ و لو فيه سبب، طب إيه هو؟

• هل أنت السبب ولا السبب في اللي بيضطهدك، ولا الظروف اللي بنرمي عليها كل حمولنا لحد ما اشتكت.

• هل انت طالب بتعمل اللي عليك، ومدرسك حطك في دماغه عشان مبتاخدش درس خصوصي عنده و معقدك و كل شوية يطلعك برة الفصل؟

• هل انت بتعمل اللي عليك في شغلك، ومديرك مضطهدك عشان مش قادر يمسك لك غلطة؟ أو عشان انت محبوب بين زملائك؟

• هل انت كل ما تروح حته تتسأل فيها عن ديانتك؟

• هل حجابك منعك انك تحققي حلمك وتشتغلي مضيفة طيران، أو شركة سياحة؟

• هل انتى بنت على ولدين و مطلعين عنيكي في الخروج و التليفون و اللبس؟

• هل انت شخصية ناجحة و كل شوية يطلع عليك اشاعات فى كل حتة؟

• هل انتى بنت و اهلك كان نفسهم في ولد و بتتعاملى على هذا الاساس؟

عن نظرة المجتمع للمرأة - اضطهاد

لو انت أي واحد من دول الف مبرووووك انت مضطهد.

الاضطهاد هو التقليل من شأن فرد أو مجموعة.

الاضطهاد هو: استخدام السلطة أو القوة لتدعيم مجموعة على حساب تضعيف وتهميش مجموعة أخرى. و ده كمان ممكن يكون قهر، على مستوى الفرد من شخص للتاني. والاضطهاد يظهر بوضوح في القوميات والتمييز بينها بصورة اضطهادية كتغليب فرقة على أخرى.

ده بقى تعريف الاضطهاد في ويكيبيديا، وبما إننا مش في محاضرة علم نفس، فالتعريف الحياتي للاضطهاد هو التقليل من شأن فرد أو مجموعة، و معاملتها معاملة سيئة والتمييز في المعاملة أو التصرفات.. أو بكلام أسهل شوية أن يكون هناك شخص أو أشخاص لايستطيعوا المنافسة الشريفة، فبدل ما يشتغلوا أكتر يقللوا من الناس اللي حواليهم عشان هما يظهروا؟؟

• لو ركزنا في أي حالة من الحالات اللي قلتها هنلاقي إن الانسان المضطهد قوي جدًا.

• المدرس الغلبان عايز يكتر دروسه، ودخله.

• مديرك يا حرام مش عارف يكون محبوب و خايف من نجاحك.

• هو انت لوحدك اللي مسلم أو مسيحى؟ فيه ناس نفوسها ضعيفة أوي.

• أخدتي قرار الحجاب بقوتك ونفسك أكيد في مجالات كتير في السياحة، و الطيران برده بتقبل محجبات.

• بنت على ولدين يعني طبيعي مدللة يا عينى على اخواتك الولاد.

• بالنسبة للإشاعات لو حطيتها كلها تحت رجليك ووقفت عليها هتعلى أوي.

• بالنسبة للبنت يهب لمن يشاء إناث ويهب لمن يشاء ذكور مش ذنبك إنتي.

لو فنطنا كل الكلام ده هنلاقي إن المضطهدين دول أقوياء جدًا؛ لأنهم لو ركزوا شوية هيلاقوا إن اللى بيضطهدهم هو اللي ضعيف و غلبان ومحتاج علاج. وإن انت مش لازم تستسلم لفكرة انك مضطهد و يجيلك بارانويا من اشخاص مبتعملكش حاجة.

فكرة الاضطهاد فيروس هيكبر جواك ويدمرك لو استسلمتله، خد الطاقة السلبية من معاملتهم و اخلطها بقوتك هتعيش أسعد منهم بكتيييير.

المضطهدين دول أقوياء جدًا

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع